L-ITALJA TAĦT IL-PIŻ TAL-IMMIGRANTI U T-TERREMOTI

L-Italja fl-2017 se tonfoq bejn €6.6 u €7 biljun ewro minħabba t-terremoti u l-kriżi tal-immigrazzjoni. Dan qalu l-Ministru tal-Finanzi Taljan Pier Carlo Padoan wara talba mill-Kummissjoni biex jiċċara l-figuri fl-abbozz tad-dokument tal-baġit.

L-Italja ma tixtieqx tnaqqas b’ħafna d-defiċit tagħha minħabba d-diffikultajiet tal-immigrazzjoni u l-effetti diżastrużi tat-terremoti li laqtu l-pajjiż. Il-pożizzjoni tal-Prim Ministru Taljan Matteo Renzi wkoll tinsab f’pożizzjoni diffiċli hekk kif il-futur tiegħu jiddependi minn referendum kostituzzjonali f’Diċembru li ġej.

Is-sena d-dieħla l-Italja se tonfoq €2.8 biljun fir-rikostruzzjoni. Numru sostanzjali ta’ skejjel fl-Italja ġarrbu ħsarat strutturali.

L-Italja saħqet dwar ir-rwol tagħha li tipproteġi l-fruntieri esterni tal-UE u t-twettiq tal-obbligazzjonijiet umanitarji tal-Unjoni li ssalva l-ħajja tal-immigranti fuq il-baħar. In-numru ta’ immigranti li waslu l-Italja fl-2016 huwa akbar mill-influss li wasal fir-Rebbiegħa Għarbija fl-2011-2012. In-nefqa għal operazzjonijiet ta’ salvataġġ, kura medika, housing u edukazzjoni għal aktar minn 20, 000 tifel u tifla taħt l-eta` u mhux akkompanjati hija stmata li tlaħħaq it-€3.3 biljun fl-2016 u €3.8 biljun fl-2017. Jekk l-għadd ta’ immigranti jibqa’ jiżdied bir-rata attwali, l-ispiża tiżdied għal €4.2 biljun.