IRIDU JĠEDDU L-KONTROLLI FUQ IL-FRUNTIERI

L-Awstrija, Franza, il-Ġermanja, id-Danimarka u n-Norveġja jridu jġeddu d-dritt li jwettqu l-kontrolli  fuq il-fruntieri minkejja li qegħdin fiż-żona Schengen. Dawn il-pajjiżi jixtiequ li dan id-dritt jitwal għal bejn sentejn u erba’ snin.

Fil-qofol tal-kriżi tal-immigrazzjoni f’Settembru tal-2015, il-Ġermanja, l-Awstrija, id-Danimarka, l-Isvezja u n-Norveġja (li mhux membru sħiħ tal-UE) bdew jikkontrollaw il-fruntieri interni f’pajjiżhom. F’Mejju li għadda dawn il-pajjiżi kienu awtorizzati biex iġeddu l-kontrolli sa nofs ix-xahar ta’ Novembru.

Franza daħħlet lura l-kontrolli fuq il-fruntieri f’Novembru tal-2015 minħabba t-theddida tat-terroriżmu.

It-theddida tat-terroriżmu issa qed tkun raġuni biżżejjed biex jibqgħu jsiru l-kontrolli fuq il-fruntieri.

Skont il-kodiċi ta’ Schengen il-kontrolli fuq il-fruntieri interni jistgħu jsiru f’ċirkostanzi speċjali u għal perijodu ta’ sitt xhur. Jistgħu jiġġeddu sitt xhur, sitt xhur, sa massimu ta’ sentejn. Dawn is-sentejn issa waslu biex jiskadu.

Il-Kummissjoni Ewropea mistennija tiddeċiedi dwar din it-talba sal-aħħar ta’ Settembru.