L-ISTATI UNITI U L-EWROPA MA JAQBLUX DWAR L-IRAN

IL-Viċi President tal-Istati Uniti Mike Pence saħaq li l-pajjiżi Ewropej għandhom jimitaw lil pajjiżu u jirtiraw mill-ftehim nukleari tal-2015 mal-Iran. B’dan il-ftehim numru ta’ potenzi mid-dinja kollha qablu li jneħħu s-sanzjonijiet minn fuq l-Iran jekk dan inaqqas mill-programm nukleari tiegħu.

L-Istati Uniti irtirat minn dan il-ftehim u reġgħet imponiet sanzjonijiet fuq l-Iran.

Franza, il-Ġermanja, ir-Renju Unit, l-UE, ir-Russja u ċ-Ċina bdew jaħdmu biex iżommu fis-seħħ dan il-ftehim.

Il-President tal-Istati Uniti Trump qal li l-ftehim huwa ‘difettuż’

“Ir-reġim Iranjan jinvoka Olokawst ieħor, u jipprova jsib il-mezzi biex jiksbu” qal Pence.

Il-Kanċilliera Angela Merkel iddefendiet il-ftehim nukleari u qalet li dan għandu jibqa’ biex l-Iran ma jibqax jibni l-armi nukleari.

Dawn id-dikjarazzjonijiet saru fil-Konferenza Annwali tas-Sigurta` fi Munich u jirriflettu differenza kbira fil-politika barranija tal-Istati Uniti u tal-Ewropa.