BIŻA’ FIL-MILIED

Il-forzi tas-sigurta` fl-Ewropa qed ikunu viġilanti ħafna biex jilqgħu għal kull attentat terroristiku li jista’ jsir f’dawn il-ġranet tas-sena. L-aċċess għal żoni pubbliċi fejn isiru s-swieq tradizzjonali tal-Milied qed jingħataw attenzjoni partikolari. Fi Strasburgu – magħrufa bħala l-Kapitali tal-Milied –  fejn din il-ġimgħa ltaqa’ l-Parlament Ewropew qabel ixolji sal-bidu tas-sena, pulizija qed jagħmlu tfittxijiet u jikkontrollaw lil kull min jidħol f’dawn is-swieq tal-Milied.

L-Istat Iżlamiku għadu perikoluż u fil-mira ewlenija tiegħu hemm Franza. Rapport mill-fergħa ta’ kontra t-terroriżmu tal-aġenzija tal-pulizija Ewropea, Europol jgħid li huwa probabbli li jsiru attakki terroristiċi ġodda. Il-Europol qalet li l-IS taf tbiddel it-tattika tagħha u qed tippjana li tuża karozzi bomba biex tolqot l-Ewropa.

L-użu ta’ oġġetti splussivi mixtrija online jew oġġetti militari oħra mpoġġija fil-karozzi, huma komuni ħafna fis-Sirja u l-Iraq, iżda fl-Ewropa għadna ma rajnihomx. Ir-rapport jgħid li huwa naturali li dawn it-tattiċi se jkunu kkopjati mit-terroristi fl-Ewropa.

L-attakki jsiru kemm minn ‘ilpup’ solitarji kif ukoll minn gruppi li jaħdmu flimkien ispirati mill-IS. Splussivi, rifles awtomatiċi, skieken jew karozzi, kollha ntużaw f’attakki ppjanati jew f’oħrajn li dehru aktar spontanji. Il-Europol qalet li l-IS qed ikun effettiv biex iħajjar individwi jikkommettu atti terroristiċi.

L-esperti inkwetati li l-Libja ssir bażi għall-IS minfejn ikunu ppjanati attakki terroristiċi fl-Afrika ta’ Fuq u fl-Ewropa. Fl-2015, il-forzi tas-sigurta` Ewropej arrestaw 667 persuna fuq suspett li ħadu sehem f’attivitajiet tal-IS.