PITTELLA FAVUR AĠENDA SOĊJALI ĠDIDA

It-Taljan Gianni Pittella reġa’ ġie elett b’maġġoranza kbira bħala kap tal-Grupp tas-Soċjalisti u Demokratiċi tal-Parlament Ewropew għat-tieni nofs tal-mandat tal-PE. Pittella kkonferma li jixtieq isir il-president tal-Parlament Ewropew meta jitlaq Martin Schultz.

Pittella kkonferma wkoll li jixtieq itemm il-koalizzjoni taż-żewġ partiti l-kbar fil-Parlament Ewropew – l-EPP-S&D, maħluqa mill-President Schultz. Pittella bħalissa qed ikollu laqgħat mal-gruppi politiċi kollha tal-Parlament Ewropew biex jara għandux l-appoġġ tagħhom għal kandidatura tiegħu. Jekk jilħaq president Pittella jixtieq iħalli effett fuq il-politika attwali tal-UE, l-aktar dwar l-impjiegi u t-tkabbir ekonomiku. Jixtieq ukoll aġenda soċjali ġdida.

Gianni Pittella sostna li mhux se jaċċetta li t-tliet istituzzjonijiet Ewropej (Parlament, Kunsill u Kummissjoni) ikunu mmexxija minn membri tal-Grupp tal-EPP u jrid li kandidat tal-S&D ikun elett biex isir kap tal-Parlament. Hu qal li jbiddel fehmtu biss jekk kandidat tal-S&D isir kap tal-Kunsill tal-Unjoni Ewropea. Hu jemmen li l-S&D u l-EPP għandhom jaħdmu flimkien imma l-S&D għandha tkun għażla alternattiva u differenti mill-EPP.

Sadattant waqt laqgħa tal-Grupp tal-S&D Alfred Sant qal li jemmen li jekk is-soċjalisti jingħalqu fil-bozza ta’ Brussell, se jibqgħu jinħassu dejjem aktar imbiegħda mill-affarijiet li jinteressaw lill-familji u l-ħaddiema. It-triq ’il quddiem hija li S&D jagħmel kampanja ffokata u qawwija ħalli mill-bidu nett jiġbed l-akbar numru ta’ voti minn fost id-deputati Ewropej.