BREXIT: IL-BALLUN F’SAQAJN IL-QRATI INGLIŻI

Il-PM Ingliża Theresa May qed tistenna l-Qorti tiddeċiedi l-Gvern Ingliż jistax jiskatta Artiklu 50 mingħajr ma jgħaddi vot fil-Parlament.  May wiegħdet li tippubblika l-pjan tan-negozjati tal-Brexit qabel ma tinvoka Artiklu 50 f’Marzu.  Il-pjan tal-Brexit min-naħa tal-Gvern Ingliż mistenni jkun ippubblikat f’Jannar jew Frar biex il-Parlament Ingliż u l-poplu Brittanniku jkollu ċ-ċans jiskrutinah.

Michel Barnier, il-Kummissarju inkarigat mill-UE għan-negozjati mar-Renju Unit qal li l-ftehim tad-divorzju jrid jitlesta fi żmien 18-il xahar, jiġifieri sa Ottubru 2018, biex il-Parlament Ewropew jilħaq jirratifikah qabel l-elezzjonijiet Ewropej tal-2019. Barnier ried juri li l-UE hija lesta biex tibda n-negozjati. Saħaq li s-suq ħieles huwa magħmul mill-moviment ħieles tal-persuni, tas-servizzi, tal-oġġetti u tal-kapital. Stat ma jistax jagħżel li jelimina l-moviment ħieles tal-persuni jekk irid aċċess għall-moviment ħieles tas-servizzi u l-oġġetti.

Barnier ġie kkritikat mir-Renju Unit minħabba l-inflessibilita` tiegħu għax ma ried jibda l-ebda diskussjoni qabel ma jiġi skattat Artiklu 50 b’mod formali.

It-triq tal-Brexit hija legalment kumplessa, politikament sensittiva u żgur li se tħalli impatt fuq il-ġejjieni. Bħalissa l-ballun qiegħed f’idejn il-Qrati Ingliżi.