GĦAXAR PAJJIŻI TAL-MEDITERRAN JINGĦAQDU GĦAL SFIDI POLITIĊI U EKONOMIĊI

Għaxar pajjiżi tal-Mediterran enfasizzaw l-għaqda biex jingħelbu sfidi politiċi u ekonomiċi, l-aktar dwar il-futur taż-żgħażagħ u l-immigrazzjoni. Il-ħames membri tal-UE tal-Mediterran (Malta, l-Italja, Franza, Portugall u Spanja) u l-5 pajjiżi tal-Unjoni tal-Maghreb (Libja, Tuneżija, Alġerija, Marokk u Mauritania) qablu li jkollhom relazzjonijiet aktar fil-qrib. Dan biex jiżguraw li din iż-żona tkun waħda ta’ paċi. 

Għalissa d-djalogu tal-5+5 se jibqa’ informali. Il-prijoritajiet għad-diskussjonijiet huma ż-żgħażagħ, in-nisa fid-dinja tax-xogħol, l-appoġġ għall-industriji żgħar u medji, il-protezzjoni tal-ambjent u l-iżvilupp sostenibbli.

L-Alġerija bħalissa għandha l-kopresidenza għas-sentejn li ġejjin u se taħdem għal aktar djalogu speċjalment dwar is-salvataġġi fuq il-baħar, is-sigurta` u l-ġlieda kontra t-terroriżmu. Dan ix-xahar saret laqgħa tal-5+5 dwar is-settur tad-difiża. L-Alġerija qalet li għelbet il-problema tat-terroriżmu waħidha u lesta taqsam l-esperjenza u l-għarfien tagħha fuq dan is-settur mal-pajjiżi l-oħra.