MANIFATTURA U SERVIZZI B’SAĦĦITHOM FIR-RENJU UNIT

Is-settur tal-manifattura tar-Renju Unit fil-bidu ta’ din is-sena rrapporta rata għolja fl-esportazzjoni, ferm ogħla mir-rata ta’ dawn l-aħħar sentejn. Is-settur tas-servizzi wkoll irreġistra tkabbir b’saħħtu. Din l-aħbar hija pożittiva għax il-maġġor parti tas-settur privat Brittanniku huwa magħmul proprju mis-servizzi. Il-Kamra tal-Kummerċ Brittannika qalet li l-prospetti immedjati  jidhru tajbin ħafna. Iżda  għall-futur aktar imbiegħed hemm it-tħassib li se jiżdiedu l-ispejjeż.

Ir-rota tal-Ekonomija Brittannika għadha ddur minkejja t-tbassir tal-ekonomisti wara l-Brexit. L-esportaturi huma pożittivi hekk kif l-ekonomija globali qed tirpilja u l-isterlina tilfet mill-valur. L-ekonomisti qed ibassru li aktar tard din is-sena l-konsumaturi se jintlaqtu mill-inflazzjoni. Din mistennija togħla aktar u magħha jogħlew il-prezzijiet fir-Renju Unit, speċjalment dawk tal-ikel u tal-elettriku. Imħassba wkoll in-negozji ż-żgħar għax ma jafux se jiġri fl-2019 meta r-Renju Unit ikun ħareġ definittivament mill-Unjoni. F’kas li jkollhom jibdew iħallsu xi tariffi biex jesportaw lejn l-Unjoni, jaf jibdew jaqtgħu qalbhom.

S’issa l-konsumaturi għadhom kunfidenti u l-bejgħ ta’ oġġetti u servizzi miexi tajjeb ħafna.