INĊIDENT TERRORISTIKU KULL SITT IJIEM FL-EWROPA

 

Fl-2017 seħħ inċident terroristiku kull sitt ijiem fl-Ewropa. Huwa stmat li fl-Ewropa hawn bejn 50,000 u 70,000 individwi radikalizzati, 20,000 minnhom jinsabu fi Franza. Is-sena l-oħra l-UE kellha 62 inċident relatat mat-terroriżmu, li jinkludu 15-il attakk u 40 li nqabdu qabel ma seħħew.

Dawn il-figuri ngħataw dan ix-xahar waqt kumitat speċjali dwar it-terroriżmu fil-Parlament Ewropew mill-ispeċjalist dwar it-terroriżmu Jean Charles Brisard. Brisard huwa l-President ta’ Ċentru Ewropew li janalizza t-terroriżmu. Iċ-ċentru ntalab jikkontribwixxi fix-xogħol tal-Kumitat tal-PE dwar is-suġġett.

“Mill-2013 ’l hawn, l-attivita` terroristika kienet l-aktar intensa fi Franza, b’nofs dawn l-inċidenti identifikati hemmhekk. Kważi 40% tal-attentati ta’ qtil u attakki oħra kellhom fil-mira lill-uffiċċjali tal-pulizija jew tal-armata. L-attakki saru minn armi bħal skieken u esplossivi,” qal Brisard.

Brisard qal li l-Istat Iżlamiku ddgħajjef iżda t-theddida tat-terroriżmu baqgħet sostanzjali. In-numru ta’ ġellieda barranin li rritornaw fl-UE ma kienx kbir, fost oħrajn għax mietu jew telqu f’żoni oħra. Dawn il-ġellieda barranin xorta huma ta’ theddida. Franza rreġistrat 14-il ritorn fl-2017 waqt li l-Belġju u l-Ġermanja rreġistraw anqas minn 10.

53% tal-Ġiħadisti ma kinux magħrufa mis-servizzi tal-ispjunaġġ Ewropej. Mill-2004 fi Franza, 60% ta’ dawk li ngħataw sentenza fuq attivitajiet terroristiċi ma kellhom l-ebda rekord kriminali.