€500 MILJUN MHUX BIŻŻEJJED GĦAT-TELF TAL-BDIEWA MIS-SUQ RUSSU

Il-Membri Parlamentari Ewropej jaħsbu li l-pakket ta’ €500 miljun ewro tal-Kummissjoni għas-settur agrikolu mhux biżżejjed biex jagħmel tajjeb għat-tnaqqis fil-prezzijiet u għat-telf li qed ikollhom il-bdiewa. Dan ħareġ fil-plenarja waqt dibattitu mal-Kummissarju tal-Agrikoltura Phil Hogan fejn intqal li l-istrumenti li jintużaw fi żminijiet ta’ kriżi jeħtieġ li jitjiebu filwaqt li l-pożizzjoni tal-bdiewa trid tissaħħaħ.

L-għaqda tal-bdiewa ewropej Copa-Cogeca wkoll uriet id-diżappunt tagħha għall-pakkett ta’ €500 miljun ewro. Din l-għajnuna mhux biżżejjed biex tagħmel tajjeb għat-telf tas-suq Russu li kien jammonta għall-esportazzjoni ta’ €5.5 biljun ewro fis-sena. L-Għaqda sostniet li l-pakkett tal-Kummissjoni ftit li xejn jitkellem dwar miżuri li jikkontrollaw is-suq u li jsolvu l-problemi fl-immedjat. Copa-Cogeca qalet li l-Kummissjoni taf li hemm kriżi kbira fis-settur imma qed tirrifjuta li tirranġaha.

Ħafna mill-Ministri tal-agrikoltura ewropej qablu mal-proposti tal-Kummissjoni waqt laqgħa informali fil-Lussemburgu. L-Awstrija, l-Polonja u anki l-Italja u l-Belġju kienu kritiċi għal ċerti miżuri jew dwar l-ammont ta’ flus li se jiksbu f’għajnuna diretta.

Mill-€500 miljun f’għajnuniet, €420 se jmorru f’dawn l-oqsma: €30 miljun għall-promozzjoni ta’ prodotti ewropej (ħalib u laħam tal-majjal), madwar €30 miljun f’għajnuna għar-refuġjati u madwar €20 miljun għal ħażna privata (ta’ ħalib, ġobon u laħam tal-majjal).

80% ta’ €420 miljun se jinqassmu skont il-kwoti tal-ħalib tal-istati membri tal-2014. L-20% l-oħra se jmorru għal dawk il-pajjiżi bl-akbar tnaqqis fil-prezzijiet tal-laħam tal-majjal minħabba l-embargo Russu fuq l-importazzjoni, b’mod partikolari l-istati Baltiċi u l-Finlandja, u dawk li kellhom Sajf niexef – il-Polonja u r-Rumanija.

Dawk li se jgawdu minn din l-għajnuna huma l-ikbar produtturi tal-ħalib. Il-Ġermanja hija l-iktar pajjiż li tipproduċi ħalib u se tieħu €69 miljun, Franza, €62.9 miljun, ir-Renju Unit €36.07 miljun, Polonja €28.95 miljun, Olanda €29.94 miljun, Spanja €25.53 miljun, l-Italja, €25.02 miljun, l-Irlanda €13.73 miljun, Finlandja €8.99 miljun, Litwanja €12.63 miljun, Danimarka €11.10 miljun, Rumanija €11.15 miljun, Belġju €13.05 miljun, Svezja €8.22 miljun, Repubblika Ċeka €11.16 miljun, Awstrija €7 miljuni, Ungerija €9.51 miljun, Latvja €8.45 miljun, Estonja €7.56 miljun, Portugall €4.76 miljun, Slovakkja €2.46 miljun, Bulgarija €6 miljun, Kroazja €1.81 miljun, Greċja €2.26 miljun, Slovenja €1.37 miljun, Lussemburgu €0.67 miljun, Ċipru €0.35 miljun u Malta €0.12-il miljun.

Il-miżuri se jibdew jitwettqu fl-aħħar ta’ Ottubru.