PAJJIŻI ŻGĦAR ŻVANTAĠĠATI EKONOMIKAMENT GĦANDHOM IKUNU KKUMPENSATI BIL-KOMPETIZZJONI FIT-TAXXA

Il-pajjiżi żgħar fil-periferija tal-Unjoni Ewropea m’għandhomx jinżammu milli jissettjaw taxxi fuq id-dħul ta’ kumpanniji li joperaw f’pajjiżhom biex jikkumpensaw għall-iżvantaġġi li jbatu minħabba fil-kompetizzjoni għall-investiment u x-xogħol li teżisti fis-suq wieħed Ewropew. Dan qalu l-Kap tad-Delegazzjoni Laburista Maltija fil-Parlament Ewropew lill-Kumitat Ekonomiku u Finanzjarju (ECON) fi Brussell li kien qed jiddiskuti rapport dwar il-konverġenza tat-taxxi tal-parlamenti nazzjonali u t-taxxi tal-istati membri. “Fejn jeżistu żvantaġġi ekonomiċi għall-pajjiżi żgħar għandhom ikunu kkumpensati bil-kompetizzjoni fit-taxxa’, enfasizza Dr. Alfred Sant.

Membri Parlamentari oħra minn Ċipru, Sardinja u l-Irlanda esprimew dan is-sentiment u qalu li l-proposta ta’ sistema waħda ta’ taxxi tmur kontra l-interessi tagħhom fir-rapport li mistenni jitressaq għall-vot fil-Parlament Ewropew f’Diċembru 2015.

Dr. Sant qal li l-UE trid tara li l-konverġenza bejn it-taxxi deċiżi mill-parlamenti nazzjonali ma’ dawk tal-istati membri tal-gżejjer żgħar u r-reġjuni fil-perifierija ma ttellifx il-vantaġġi ekonomiċi li l-istati żgħar għandhom fuq il-pajjiżi l-kbar. Il-pajjiżi ż-żgħar u r-reġjuni periferali diġa` aċċettaw ir-regoli tas-suq ħieles u regoli strinġenti li ma jippermettux għajnuna tal-istat fost l-oħrajn. Dawn ir-regoli diġa` tellfu ħafna mill-flessibilita` li l-pajjiżi kellhom biex jikkompetu mal-pajjiżi l-kbar.

Dr. Sant qal li huwa importanti ħafna li jkun hemm it-trasparenza fil-politika tat-taxxi. Imma jekk l-UE se timbotta din il-konverġenza, il-pajjiżi ż-żgħar u r-reġjuni periferali għandhom jitħallew jikkompetu b’mod trasparenti fis-suq komuni tal-Ewropa.

Tista’ ssegwi l-intervent sħiħ ta’ Dr. Sant fuq din il-link :

https://www.youtube.com/watch?v=wF6w9Y2wGeM