IL-BALKANI PARTI MILL-PROĠETT EWROPEW

Federica Mogherini, responsabbli mill-Affarijiet Barranin u l-Politika ta’ Sigurtà tal-UE, qalet li l-proċess tat-tkabbir tal-Unjoni Ewropea se jkompli minkejja l-BREXIT. Mogherini, li flimkien ma’ mexxejja Ewropej,  attendiet is-Summit tal-pajjiżi tal-Balkani f’Pariġi enfasizzat li l-proċess tat-tkabbir tal-UE bi sħubija ġdida tal-pajjiżi tal-Balkani se jkompli. “Irridu nieħdu ħsieb l-entużjażmu ewropew fir-reġjun tal-Balkani. L-UE kienet u għadha b’saħħitha. Huwa fl-interess tagħna li l-proċess tat-tkabbir jibqa’ għaddej. Hekk se nagħmlu.”

Mogherini qalet li l-għażla tal-BREXIT ma tfissirx it-tmiem tal-UE. ‘Il-pajjiżi tal-Balkani jaraw l-UE bħala proġett kbir ta’ paċi, żvilupp ekonomiku u opportunitajiet għaż-żgħażagħ. Meta nħarsu lejn l-UE minn għajnejn il-popli tal-Balkani nifhmu xi nkunu qed nitilfu jekk ma nkomplux għaddejjin bil-proġett Ewropew. L-entużjażmu Ewopew tal-pajjiżi tal-Balkani għandu jkun sors ta’ ispirazzjoni fi ħdan il-fruntieri tal-UE.”

Merkel, Hollande u l-Prim Ministru Kroat Tihomir Oreskovic qalu li l-BREXIT mhux se jaffettwa t-tkabbir tal-UE. “Il-vot tal-BREXIT mhux se jaffettwa l-proġett tat-tkabbir fir-reġjun tal-Balkani” qal Hollande. Fil-fehma ta’ Merkel, “Id-deċiżjoni tal-BREXIT ma bidlet xejn.” Oreskovic saħaq li “BREXIT ma jfissirx it-tmiem tat-tkabbir fil-pajjiżi tal-Balkani.”