IL-PRESIDENZA SLOVAKKA KONTRA TIBDIL FIT-TRATTATI

Il-Prim Ministru Slovakk Robert Fico qal li matul il-Presidenza Slovakka mhux qed jippjana tibdil fit-trattati bħala parti mir-riformi tal-Unjoni Ewropea. Wara l-BREXIT ħafna jħossu li hemm bżonn ta’ riformi fil-fond fl-UE. Fico qal li matul il-Presidenza ta’ pajjiżu se jfittex li jikkomunika aktar fuq il-vantaġġi tas-sħubija fl-UE. Il-Ġermanja u l-Awstrija jaqblu ma’ dan il-ħsieb. Filwaqt li l-Polonja qed issejjaħ fil-miftuħ għal riformi instituzzjonali.

Il-pajjiżi membri ftiehmu li jagħmlu żmien ta’ riflessjoni qabel ma jerġgħu jiltaqgħu għal-laqgħa informali fis-16 ta’ Settembru fi Bratislava. Fico qal li laqgħa lil hinn minn Brussell jaf tkun aktar effettiva.

Il-President tal-Kummissjoni Jean-Claude Juncker qal li sal-2003 il-laqgħat tal-Kunsill Ewropew kienu jsiru fil-pajjiż li jkollu l-presidenza. L-affarijiet inbidlu bit-trattat ta’ Nizza għax huwa irħas li jsiru Brussell. Il-Kummissjoni qalet li r-riformi, li jinkludu dawk dwar is-suq komuni, jridu jiġu spjegati tajjeb liċ-ċittadini Ewropej.

L-Unjoni Ewropea għandha sfida kbira dwar bilanċ fil-qasam tal-immigrazzjoni, mhux biss mar-Renju Unit. L-Unjoni qed tisħaq li jekk dan il-pajjiż irid aċċess għas-suq ħieles, irid iħalli moviment ħieles ukoll għaċ-ċittadini Ewropej.

Il-kwistjoni tal-immigrazzjoni mhix tqum biss fil-każ tar-Renju Unit. Fuq livell Ewropew il-Kummissjoni għandha l-problemi mas-Slovakki. Is-Slovakkja ħadet passi legali kontra r-regoli imposti mill-Kummissjoni dwar l-allokazzjoni obbligatorja tal-kwoti għall-immigranti. Is-Slovakkja ma taqbilx ukoll mar-riformi tat-trattat ta’ Dublin li jisħqu fuq sanzjonijiet ekonomiċi għal dawk l-istati membri li ma jridux jaċċettaw immigranti f’pajjiżhom.