IL-FAXXISTI SLOVAKKI SE JIKKONTESTAW L-ELEZZJONIJIET EWROPEJ

Il-Partit tal-Faxxisti fis-Slovakkja se jkunu jistgħu jikkontestaw l-elezzjonijiet Ewropej wara deċiżjoni tal-Qorti Slovakka. Il-partit tal-lemin estrem huwa  kontra l-immigrazzjoni u kontra l-komunita` tar-Roma. Bħalissa għandu l-appoġġ ta’ 10% tal-votanti. Dan il-partit daħal l-ewwel darba fil-parlament f’Marzu tal-2016 bi 13-il siġġu minn 150 siġġijiet.

Fl-2017 il-prosekuturi  fis-Slovakkja talbu li jissanzjonaw lil partit People’s Party Our Slovakia (LSNS), fuq il-bażi li dan il-partit kien qed jikser id-demokrazija.

Il-mexxej tal-Partit Marian Kotleba, 42 sena, magħruf li mexxa n-nies fit-toroq libsin l-uniformijiet suwed tan-neo-Nażisti qabel ma daħal fil-parlament. Kotleba kemm-il darba nżamm mill-pulizija u nstab ħati ta’ diskors ta’ mibegħda. Huwa faħħar ukoll President Slovakk ta’ żmien it-tieni gwerra dinjija Jozef Tiso, li qabel li jiddeporta għexieren ta’ eluf ta’ Lhud fil-Ġermanja Nażista.

“LSNS huwa partit faxxist,” qal il-Ministru tal-Ġustizzja Gabor Gal qabel il-verdett. “Il-Faxxiżmu ma għandux post fl-Islovakkja”.

Il-verdett għoġob ħafna lil Partit LSNS bil-mexxej Kotleba.

“Aħna qatt ma ksirna l-liġijiet tal-pajjiż u m’aħniex theddida għad-demokrazija.”

Kotleba qed iħeġġeġ lin-nies jivvotaw lil kandidati tal-partit tiegħu fl-elezzjonijiet tal-Parlament Ewropew.