L-INTERESSI TA’ MALTA  L-EWWEL U QABEL KOLLOX

Se jkun kruċjali għall-Maltin u l-Għawdxin li fil-Parlament Ewropew ipoġġu deputati li tassew u l-ħin kollu jpoġġu l-interessi ta’ Malta l-ewwel u qabel kollox. Fil-Parlament matul il-ħames snin li ġejjin, is-sitwazzjoni se tkun aktar iebsa għal Malta milli diġà kienet matul l-aħħar mandat. Taħt attakk, se tibqa’ tkun is-sistema li biha Malta tissettja t-tassazzjoni tagħha. Din sa issa kienet kruċjali biex pajjiżna, taħt gvern soċjalista, ikebbes tkabbir ekonomiku bla preċedent mill-Indipendenza lil hawn, titjib li baqa’ għaddej għal numru ta’ snin u għadu sejjer. Fl-aħħar snin, kellna nopponu bil-qawwi proposti finanzjarji li huma ta’ detriment għall-ekonomija tagħna għax tnaqqsilna mill-flessibiltà fil-mod kif nissettjaw it-taxxi tagħna.

Malta teħtieġ il-flessibilità biex nattiraw l-investiment lejna, qal l-ex Prim Ministru Alfred Sant fin-Naxxar.

“B’xorti ħażina, l-imġiba tad-deputati Nazzjonalisti fil-Parlament ħadmet biex tiġbed kritika u attakki fuq isem il-pajjiż u serviet l-interessi ta’ dawk li jridu jmexxu proposti li jagħmlulna ħsara.”

Alfred Sant qal li kien ta’ għajb li d-Deputati Nazzjonalisti fil-Parlament Ewropew taw l-appoġġ tagħhom biex Parlamentari oħra barranin attakkaw lil Malta. Kull deputat irid jaħdem b’diliġenza, onestà, u impenn. B’hekk biss nistgħu nikkompensaw għall-fatt li n-numru ta’ deputati Maltin hu tassew ċkejken fil-Parlament Ewropew.