L-OBESITA`: PESTA FOST IT-TFAL FIN-NOFSINHAR TAL-EWROPA

Il-każijiet ta’ obeżita` u piż żejjed żdiedu fin-naħa t’isfel tal-Ewropa, skont studju tal-Għaqda Dinjija tas-Saħħa (WHO). L-organizzazzjoni ppreżentat ir-riċerka tagħha fejn instab li f’pajjiżi fis-Sud tal-Ewropa bħal Greċja, Malta, l-Italja, Spanja u San Marino l-obeżita` hija ogħla minn 4% tal-popolazzjoni tat-tfal tal-iskola – l-ogħla fost il-21 pajjiż li fih sar dan l-istudju.

Fil-pajjiżi nordiċi u tal-punent bħal Belġju, Irlanda, Norveġja u Svezja r-rati huma ta’ anqas minn 2%.

Fl-istudju ma kinux inklużi pajjiżi kbar bħal Ġermanja, Franza u r-Renju Unit.

Fil-Greċja, Spanja u l-Italja hemm prevalenza ta’ 40% tal-popolazzjoni li għandha piż żejjed jew obeżita`, filwaqt li f’San Marino, Portugall u Malta l-persentaġġ huwa ta’ aktar minn 30%.

Għadu mhux ċar għaliex il-pajjiżi tas-Sud tal-Ewropa huma aktar milqutin bl-obeżita`

L-irqad, id-dieta u l-attivita` fiżika kollha huma fatturi li jaffettwaw il-piż. Ir-riċerkaturi qalu li l-problema qed tiżdied anki minħabba l-fatt li d-dieta Mediterranea qed tonqos.