IS-SOĊJETA` ĊIVILI GĦAWDXIJA GĦANDHA TKUN PROTAGONISTA

Is-soċjeta` ċivili f’Għawdex għandha tkun il-protagonista fid-deċiżjonijiet li jolqtu l-interessi tal-istudenti, il-ħaddiema u l-bdiewa Għawdxin. Is-sehem tal-għaqdiet mhux governattivi Għawdxin għandu jkun formalizzat fuq livell reġjonali u eventwalment il-Ministeru għal Għawdex ikun id-driegħ eżekuttiv ta’ Kunsill Reġjonali għal Għawdex. Dan qalu Alfred Sant waqt il-Konferenza ‘X’jistennew l-Għawdxin mill-Ewropa’ fil-Lukanda Calypso, Marsalforn Għawdex.

Dr Sant qal li l-valuri soċjali Ewropej jistgħu jiġu attwati waqt li l-Għawdxin jimxu skont l-aspirazzjonijiet reġjonali tagħhom bħala gżira bi sfidi simili għal gżejjer oħra fil-periferija tal-UE.

“Hemm bżonn soluzzjonijiet ġodda bis-sehem tas-soċjeta` ċivili li tħoss il-polz tal-Għawdxin. Għandhom jinħolqu kondizzjonijiet soċjali u ekonomiċi biex jilħqu l-aspirazzjonijiet taż-żgħażagħ, il-ħaddiema u l-bdiewa Għawdxin.”

Dr Sant qal li rridu niżguraw li s-suq u l-kondizzjonijiet tal-impjiegi f’Għawdex ikunu fl-istess livell ta’ Malta biex iż-żgħażagħ u l-ħaddiema Għawdxin isibu impjiegi li jirrispettaw il-kwalifiki u l-ħila tagħhom”.

Dr Sant qal li fil-Parlament Ewropew ingħaqad ma’ Ewroparlamentari minn gżejjer mill-Kroazja, Sardinja u Sqallija biex jippreżentaw front wieħed dwar l-isfidi tal-gżejjer fil-periferija tal-UE.