IL-PROPOSTI TA’ MACRON GĦALL-ĠGANTI TAL-INTERNET MHUX FL-INTERESS TA’ MALTA                 

Il-proposti tal-President Franċiż Macron għall-ġganti tal-internet li għandhom suq Ewropew se jwasslu għall-armonizzazzjoni tat-taxxa fl-Ewropa. Dan qalu Alfred Sant lil France 24 meta irrefera għall-effett tal-proposti ta’ Macron fuq il-pajjiżi żgħar tal-UE fejn huma bbażati ‘kumpaniji diġitali li huma ntaxxati ftit’. Il-President Franċiż irid li l-kumpaniji diġitali Amerikani kbar b’suq Ewropew iħallsu t-taxxa fuq it-turnover.

“Ma naqbilx mas-soluzzjonijiet ta’ Emmanuel Macron – inkluż proposta dwar taxxa konsolidata komuni – għax dan l-argument huwa feles biex tidħol l-armonizzazzjoni tat-taxxa fl-Ewropa. Dan inaqqas il-flessibilita` tal-istati membri ż-żgħar u periferali tal-UE bħal Malta li jipprovaw jattiraw investiment lejhom.”

Dr Sant qal li jaqbel li jkun hemm trasparenza fuq il-ġbir tat-taxxa fl-UE :

“L-ewwel l-affarijiet għandhom isiru fuq bażi nazzjonali u mbagħad isiru fuq bażi Ewropea. Diġa` hemm għodda fuq livelli nazzjonali biex nimxu ’l quddiem. Kull stat membru jista’ jippubblika l-ismijiet tal-kumpaniji u l-kontribuzzjoni tagħhom fil-qasam tat-taxxa. Permezz ta’ awditjar intern fuq il-kummerċ tal-VAT wieħed jista’ jara t-turnover ta’ kumpaniji differenti. Il-valur miżjud għall-ekonomija huwa traċċabbli fuq il-bażi ta’ profitti.”

L-Istati Uniti għandhom liberta` fil-kompetizzjoni tat-taxxa u l-ebda stat ma hu obbligat li jsegwi r-regoli li l-istati l-oħra jsegwu.

Fil-programm ħadu sehem l-Ewroparlamentari Alain Lamassoure (EPP) u Marju Lauristin (S&D)

TISTA’ SSEGWI L-INTERVENT TA’ DR SANT FUQ DIN IL-LINK

https://www.youtube.com/watch?v=li5rkqu57-Q