JISSAĦĦAĦ IS-SETTUR BANKARJU

Mario Draghi, President tal-Bank Ċentrali Ewropew (BĊE) qal li s-settur bankarju fl-Ewropa huwa b’saħħtu għax tul l-aħħar snin il-banek kienu obbligati jżidu l-kapital tagħhom. B’hekk saru jifilħu aktar għax-xokkijiet u l-effetti negattivi. Hu qal li bis-saħħa tar-regoli l-ġodda l-industrija bankarja tippjana l-istruttura tal-kapital aħjar.

Xorta għad hemm tħassib dwar self li ma jrendix. Dan huwa l-akbar uġigħ ta’ ras għall-investituri. Draghi qal li se jkun possibbli li fis-snin li ġejjin dan it-tip ta’ dejn jiġi solvut.

Draghi qal li f’Marzu, meta jkollu l-figuri tal-inflazzjoni, jista’ jagħmel aġġustament fuq il-proċess ta’ ‘quantitative easing’ (programm li permezz tiegħu l-BĊE qed jitfa’ l-flus fis-suq). 

Draghi qal ukoll li l-BĊE se jieħu passi fuq il-karti tal-flus tal-€500 li x’aktarx qed jintużaw għall-finanzjament tat-terroriżmu.