JIŻDIEDU N-NIES BLA SAQAF FL-EWROPA

Qed jiżdiedu n-nies bla saqaf fl-Ewropa. Dan ħareġ waqt seminar fil-Parlament Ewropew organizzat minn FEANTSA, il-federazzjoni Ewropea ta’ organizzazzjonijiet mill-istati membri li jaħdmu ma’ din il-minorita` ta’ nies. F’dan is-seminar ġew esplorati r-raġunijiet għala ċittadini Ewropej li jmorru f’postijiet oħra fl-Ewropa huma aktar vulnerabbli li jispiċċaw bla saqaf, speċjalment jekk ikollhom kundizzjonijiet ta’ xogħol prekarju.

L-Ewroparlamentari Malti Alfred Sant qal li jinħtieġu soluzzjonijiet sistematiċi għan-nies bla saqaf fl-Ewropa u jidher li m’hemmx aptit politiku għal dan. Is-soluzzjonijiet parzjali mhumiex biżżejjed u huwa diffiċli negħlbu t-tentazzjoni li nikklassifikaw in-nies bla saqaf bħala problema marġinali. Dr Sant qal li l-Ewropa, għal darb’oħra, mhux tagħti kas din il-minorita` ta’ nies li ma rnexxilhomx joħolqu ħajja aħjar f’pajjiż Ewropew ieħor.

“Għalkemm ir-reġjun Ewropew huwa wieħed mill-iktar reġjuni għonja u soċjalment avvanzati fid-dinja, il-problema tan-nies bla saqaf hija kbira. Agħar minn hekk, din il-problema qed tikber. Dan mhux biss minħabba l-fenomenu tal-immigrazzjoni irregolari u bil-wasla ta’ numru kbir ta’ refuġjati. Il-problema qed tikber ukoll minħabba n-numru dejjem jiżdied ta’ ċittadini Ewropej li jagħżlu li jmorru f’pajjiż ieħor fi ħdan l-Unjoni bl-għan li jkollhom ħajja aħjar imma ma jirnexxilhomx. L-isfida ewlenija hija li nifhmu kif u għaliex is-soċjetà Ewropea li qed nippruvaw infasslu qed tħalli lok għal nies li jisfaw bla saqaf”. qal Dr Sant.

Therese Cini Sarreo, li rrappreżentat lil Malta u l-organizzazzjoni YMCA, tat idea ġenerali tas-sitwazzjoni tan-nies Ewropej li sfaw bla saqaf f’Malta.