TLIET XHUR DETERMINANTI GĦAX-XENGEN

It-tliet xhur li ġejjin se jkunu determinanti għall-futur tax-Xengen. Kollox jiddependi minn kemm se jaħdem il-pjan ta’ azzjoni tal-UE mat-Turkija u minn kemm il-Greċja se tkun kapaċi tmexxi l-fruntieri tagħha aħjar mix-xhur li għaddew. Il-mexxejja Ewropej qed jittamaw li l-pjan mat-Turkija jirnexxi biex l-influss ta’ immigranti jonqos u ma jkunx hemm għalfejn ta’ fruntieri interni bejn il-pajjiżi. Jekk l-influss ta’ immigranti ma jonqosx, ix-Xengen f’riskju li tikkollassa.

Bħalissa hemm mat-300,000 Sirjan jistennew rifuġju fit-Turkija. It-Turkija diġa` għandha 2.5 miljun Sirjan fuq it-territorju tagħha. Minkejja l-pjan ta’ azzjoni, għalissa n-numru ta’ immigranti li deħlin mill-Greċja għadu għoli ħafna. Jekk fir-Rebbiegħa jerġa’ jiżdied il-mewġ tal-immigranti, l-UE terġa’ ssib ruħha fuq sieq waħda.

L-UE qed tittama li t-€3 biljun lit-Turkija jsarrfu f’inqas immigranti lejn l-Ewropa.

Il-Ġreċja, qrib ħafna t-Turkija, kienet parikolarment milquta mill-kriżi tal-immigrazzjoni u ma setgħetx tlaħħaq mal-immigranti. Dan il-pajjiż ingħata 50 rakkomandazzjoni li jrid jimplimenta fi tliet xhur, minkejja li l-Greċja vvutat kontrihom. Il-ħsieb hu li bi tmexxija tajba tal-fruntiera Griega, il-pajjiżi l-oħra tax-Xengen ma jkollhomx għalfejn jagħmlu l-kontrolli fuq il-fruntieri interni tagħhom. Diġa` hemm il-pjan pero`, li jekk l-affarijiet ma jitjibux fi żmien tliet xhur, xi pajjiżi tax-Xengen jestendu l-kontrolli fuq il-fruntieri interni għal sentejn.

Fost ir-rakkommandazzjonijiet hemm il-ħtieġa li l-Greċja ttejjeb il-proċess ta’ reġistrazzjoni, tgħasses aħjar u iktar ta’ spiss il-baħar Eġew, tikkopera mal-Uffiċċjali Torok, ittejjeb ir-riżorsi, l-infrastruttura u affarijiet oħra ta’ dan it-tip.

Il-Kummissjoni se tagħti €12.7 lil Greċja biex il-pajjiż joħloq 8,000 post ieħor għall-immigranti li l-UE trid li jiqbgħu fuq territorju Grieg. Il-Greċja qablet li biż-żmien toħloq 50, 000 post ġdid f’ċentri magħmula bil-kampijiet. F’dawn iċ-ċentri l-immigranti jkunu reġistrati, jittiħdulhom il-‘finger prints’ biex jiġi deċiż min hu eleġibbli għall-ażil u min għandu jintbagħat lura.

Il-Kummissjoni se tagħti €10 miljun ieħor lil Maċedonja bħala għajnuna fit-tmexxija tal-fruntiera tagħha mal-Greċja.

L-Awstrija qed tagħmel limitu fuq kemm tipproċessa applikazzjonijiet kuljum. Il-Kummissjoni qalet li dawn il-limiti huma illegali u saħqet biex kull stat membru jimxi fuq ir-regoli tax-Xengen u biex l-istati ma jeħdux inizjattivi waħedhom. L-Awstrija mhux se tipproċessa aktar minn 80 talba ta’ ażil kuljum. F’ġurnata waħda mhux se tħalli aktar minn 3, 200 persuna taqsam it-territorju tagħha.

Franza qalet li l-UE ma tistax tilqa’ aktar refuġjati. Lesta taċċetta 30,000 ruħ mill-pjan ta’ rilokazzjoni imma xejn aktar.

L-Unjoni Ewropea qed tisħaq għal soluzzjoni fuq livell Ewropew, l-aktar bil-monitoraġġ tal-pjan ta’ azzjoni tat-Turkija u bit-tmexxija tajba tal-fruntieri esterni.