KAWTELA DWAR IR-RENJU UNIT

Il-Gruppi politiċi fil-Parlament Ewropew laqgħu bil-kawtela l-qbil li ntlaħaq dwar is-sħubija tar-Renju Unit fl-UE. Saħqu li għad iridu jgħarblu dan il-ftehim. Il-Parlament Ewropew se jaħdem fuq l-aspett leġiżlattiv tal-ftehim. Permezz ta’ din il-ħidma r-Renju Unit se jkun jista’ jillimita l-ħlasijiet tal-benefiċċji soċjali lill-immigranti Ewropej li jaħdmu hemmhekk.

Il-Grupp tal-Partit Popolari Ewropew (PPE) qal li fejn hemm id-dawl, hemm ukoll id-dellijiet u li għalhekk se jkun qed jgħarbel id-dettalji qabel mal-partit jieħu pożizzjoni.

Il-President tal-Soċjalisti u Demokratiċi (S&D) Gianni Pittella qal li l-isfida issa hija li nikkonvinċu lill-Ingliżi jibqgħu fl-Unjoni. Hu wera s-sodisfazzjon tiegħu li r-Renju Unit mhux se jkollu dritt għall-veto li bih jimblokka aktar għaqda bejn l-istati membri.

Il-Partit tas-Soċjalisti Ewropej (PES) qal li l-ftehim joffri pedament sod biex tkompli l-ħidma fuq politika komuni. Il-PES hija mħassba dwar il-moviment ħieles tal-ħaddiema u l-ugwaljanza bejn iċ-ċittadini Ewropej. Dan il-partit ma qabilx li r-Renju Unit inaqqar mid-drittijiet tal-ħaddiema Ewropej li jmorru jaħdmu hemmhekk u saħaq li valur fundamentali tal-UE kien li ma jkunx hemm diskriminazzjoni.

Il-Grupp tal-Liberali (ALDE) laqa’ l-ftehim u qal li r-Renju Unit mhux favur ta’ aktar għaqda Ewropea imma mhux se jxekkel lill-pajjiżi li jridu aktar integrazzjoni.

L-Ingliża Syed Kamall tal-Partit tal-Konservattivi u Riformisti (ECR) qalet li bil-ftehim l-Unjoni kollha se tiggwadanja. Dan għaliex hemm il-possibilita` li l-parlamenti nazzjonali jopponu għal proposta leġiżlattiva Ewropea. 

Il-Kummissarju tas-Servizzi Finanzjarji Jonathan Hill saħaq dwar l-importanza tal-kumpaniji Brittaniċi li jkollhom aċċess għas-suq wieħed. Hu saħaq li jekk ir-Renju Unit jitlaq mill-Unjoni ma jkunx jista’ jieħu sehem fit-tfassil tal-leġiżlazzjonijiet Ewropej u dan ma jkunx fl-interess tar-Renju Unit.

Is-Sindku ta’ Londra Boris Johnson issa ngħaqad mal-grupp li jrid joħroġ lir-Renju Unit mill-UE. L-indikazzjonijiet sa issa huma 34% favur il-‘Brexit’. Ir-Referendum se jsir fit-23 ta’ Ġunju.