IĊ-ĊINA THEDDED L-IMPJIEG TA’ 3.5 MILJUN EWROPEW

Aktar minn 5,200 ħaddiem mis-settur tal-azzar, ħadid, ħġieġ, aluminju, siment, ċeramika u kimika ħarġu jipprotestaw quddiem il-bini tal-Istituzzjonijiet tal-UE għax huma mħassba li jitilfu xogħolhom minħabba l-importazzjoni miċ-Ċina u kompetizzjoni inġusta. Id-dimostrazzjoni saret waqt li l-Kummissjoni Ewropea organizzat konferenza dwar il-kummerċ ħieles u l-kummerċ internazzjonali.

Il-prezz fis-suq tal-prodotti manifatturati Ċiniżi huwa ħafna aktar baxx minn dak Ewropew. Bħalissa l-gvernijiet Ewropej jimponu tariffi fuq l-importazzjoni miċ-Ċina u minn pajjiżi terzi oħra ġaladarba l-prezz tagħhom jitqies li jkun ħafna aktar baxx mill-valur tas-suq.

Din it-tariffa tipproteġi l-merkanzija manifatturata fl-Ewropa. Iċ-Ċina trid li dawn it-tarrifi ma jibqgħux  imposti fuq il-prodotti tagħha. Dan ifisser li fis-suq Ewropew ikun hawn merkanzija bi prezzijiet baxxi ħafna. Il-Kummissjoni qed tgħid li jekk dan iseħħ, jintilfu mal-200,000 impjieg.

L-assoċjazzjonijiet tal-manifattura tikkwota lill-‘Economic Policy Institute’ li tgħid li 3.5 miljun impjieg ikunu mhedda. L-għaqda tal-assoċjazzjonijiet, magħrufa bħala AEGIS Europe, tiġġenera bilanċ kummerċjali pożittiv li jlaħħaq €500 biljun fis-sena u tipprovdi x-xogħol għal miljuni ta’ impjegati. Dawn kollha jintlaqtu ħażin jekk ikollhom jikkompetu mal-prezzijiet baxxi tal-prodotti Ċiniżi.

Rappreżentanti tal-ħaddiema kienu jinkludu dawk mill-Awstrija, Belġju, Bulgarija, Repubblika Ċeka, Franza, Finlandja, Ġermanja, Greċja, Ungerija, Italja, Lussemburgu, Olanda, Polonja, Rumanija, Slovakkja, Spanja, Svezja u r-Renju Unit.