MITT NEGOZJU BRITANNIKU JITOLBU TRANŻIZZJONI SA TLIET SNIN WARA L-BREXIT

Aktar minn mitt negozju attiv fir-Renju Unit, li jirrappreżentaw aktar minn 500, 000 impjieg fir-Renju Unit u aktar minn 600, 000 impjieg fl-UE, qed jitolbu perijodu ta’ tranżizzjoni sa massimu ta’ tliet snin wara l-Brexit. Dan sabiex jevitaw li jispiċċaw “fix-xifer tal-irdum” fir-relazzjoni kummerċjali l-ġdida bejn l-UE u r-Renju Unit ġaladarba r-Renju Unit ma jkunx aktar stat membru. In-negozji qed iħeġġu lin-negozjaturi tal-Brexit biex ikunu sensibbli u realistiċi u jibdew fażi ġdida fin-negozjati.

It-tieni fażi tan-negozjati hija dwar il-futur tar-relazzjonijiet kummerċjali bejn iż-żewġ naħat. In-negozjatur ewlieni tal-UE għall-Brexit Michel Barnier qal li għalkemm fit-taħdidiet sar progress, jistgħu jgħaddu ġimgħat u xhur qabel ma n-negozjati jgħaddu għal din il-fażi. Barnier reġa’ tenna li l-ewwel jeħtieġ isir qbil dwar id-divorzju mbagħad isiru l-arranġamenti dwar ir-relazzjoni kummerċjali futura bejn iż-żewġ partijiet. In-negozjatur ewlieni tal-UE saħaq li għad hemm differenzi kbar bejn iż-żewġ partijiet fosthom dwar l-obbligazzjonijiet finanzjarji tar-Renju Unit u r-rwol tal-Qorti Ewropea tal-Ġustizzja.

In-negozji qed jgħidu li jekk ma jintlaħaqx ftehim, il-konsegwenza tkun telf ta’ impjiegi u telf fit-tkabbir ekonomiku għaż-żewġ naħat.