PJAN EWROPEW TA’ DIFIŻA JINJORA L-INTERESSI TAL-PAJJIŻI NEWTRALI

Pjan Ewropew komuni għad-difiża jinjora l-interessi tal-pajjiżi newtrali filwaqt li jfassal struttura li taħdem fuq żewġ livelli –  ta’ pajjiżi li huma ġewwa u ta’ oħrajn li huma barra. Alfred Sant qal dan fil-Parlament Ewropew waqt id-dibattitu ‘Il-Pjan Ewropew ta’ Difiża u l-Futur tal-Ewropa’. Hu saħaq li l-industrija militari Ewropea tagħmel sewwa timbotta favur armonizzazzjoni tas-suq tal-armamenti, imma dan ma jiġġustifikax ‘pjan ta’ difiża’ għax l-armonizzazzjoni tista’ tinkiseb mingħajr pjan bħal dan.

“Jaqblilna nwettqu dan il-pjan? Ma naħsibx. Agħar minnhekk huwa r-raġunar attwali bbażat fuq l-idea li s-sigurta` esterna u dik interna huma wċuh differenti tal-istess munita. Dan mhux veru! Għalhekk pjan ta’ difiża aktarx jitkompla fuq il-bażi ta’ rispons militari ad hoc.”

Dr Sant qal li t-triq li tagħti għall-infern titwitta b’intenzjonijiet tajba.

“Hija ta’ dieqa, imma probabbli li l-ideat attwali li fuqhom jitnieda pjan Ewropew ta’ difiża jimxu fuq dil-linja. Pjan Ewropew ta’ difiża jaħdem tajjeb biss jekk ikun ibbażat fuq definizzjoni ċara ta’ x’inhuma l-interessi komuni tal-UE fid-difiża u sigurta` biex tilqa’ għat-theddid ta’ entitajiet statali oħra. Din id-definizzjoni għadha ma nħolqitx b’mod koerenti. Pjan bħal dan jeħtieġ ukoll ħsieb militari kif jitħarsu l-interessi ta’ sigurta` u difiża, ibbażati fuq riżorsi koordinati, u bl-abbilta` li jmorru għal gwerra. Ma jidher l-ebda ħsieb bħal dan fil-futur prevedibbli,” qal Dr Sant.