TAĦT IL-LENTI L-ELEZZJONIJIET FL-ITALJA

Il-Prim Ministru Taljan Paolo Gentiloni qal li mill-elezzjonijiet Taljani tal-4 ta’ Marzu jistenna li joħroġ gvern stabbli, dan minkejja li l-aħħar stħarriġ pubbliku juri li se jkun hemm id-diffikultajiet biex ikun ifformat gvern.

“L-Italja se jkollha gvern, gvern stabbli. Ma naħsibx li hemm riskju li l-Italja jkollha gvern dominat mill-populisti jew minn politiċi b’pożizzjoni kontra l-Ewropa. Koalizzjoni bejn il-partiti taċ-ċentru xellug immexxija mill-Partit Demokratiku hija l-unika possibilita` li l-Italja jkollha gvern stabbli u favur l-Ewropa.” qal Gentiloni.

Il-Partit taċ-ċentru lemin ta’ Silvio Berlusconi mistenni jifforma koalizzjoni ma’ żewġ partiti tal-lemin estrem biex ikun jista’ jiggverna hu.

L-aħħar stħarriġ xorta baqa’ juri riżultat b’saħħtu ħafna għal Moviment Cinque Stelle speċjalment fir-reġjuni tas-Sud tal-Italja. Ir-riżultat li jikseb dan il-moviment jista’ jxekkel li jkun ifformat il-gvern taċ-ċentru lemin ta’ Berlusconi.

L-Ewropa qed issegwi l-aħħar żviluppi fl-Italja. Rebħa għall-populisti tkun daqqa ta’ ħarta għall-istabbilita` fil-kontinent. B’mod partikolari Malta qiegħda ssegwi dak li qed iseħħ ftit ’il bogħod minna. Speċjalment wara d-dikjarazzjoni ta’ Silvio Berlusconi li jekk ikun fil-gvern l-immigranti li jiġu salvati mill-Mediterran ma jitniżżlux biss fl-Italja imma jibdew jitniżżlu wkoll f’Malta.

“Dawk li jiġu salvati qrib Malta jibdew jintbagħtu lejn Malta”, qal Berlusconi.

Din id-dikjarazzjoni u ħafna dikjarazzjonijiet oħra mill-isfidanti għall-poter fl-Italja qed ikomplu jitfgħu l-elezzjonijiet tal-4 ta’ Marzu taħt il-lenti.