IL-KUMMISSJONI EWROPEA SE TILTAQA’ MAL-PAJJIŻI TAL-VISEGRAD

Il-President tal-Kummissjoni Ewropea Jean-Claude Juncker irid jiltaqa’ mal-pajjiżi tal-Visegrad (l-Ungerija, ir-Repubblika Ċeka u s-Slovakkja) biex jiddiskutu l-futur tal-Unjoni Ewropea. Din il-laqgħa mistennija ssir lejn il-Ħarifa. Fuq quddiem tal-aġenda se jkun hemm suġġetti ta’ interess partikolari għal dawn il-pajjiżi bħall-immigrazzjoni u r-riformi tar-regoli tal-UE dwar ħaddiema Ewropej li jmorru jaħdmu f’pajjiż membru ieħor.

Fil-ġranet li għaddew il-pajjiżi tal-Visegrad wiegħdu l-appoġġ tagħhom lill-Italja waqt li wrew l-oġġezzjonijiet tagħhom għall-politika tal-UE dwar il-mekkaniżmu tar-rilokazzjoni tal-immigranti fil-pajjiżi tal-UE.

Il-Prim Ministru Slovakk Robert Fico huwa favur mini-summit immirat għall-pajjiżi tal-Visegrad. Fico qal li l-laqgħa se ssir fit-13 ta’ Settembru meta Juncker jagħmel id-diskors ewlieni tiegħu fi Strasburgu. Fico jaqbel ħafna mal-mini-summits bi preżenza limitata ta’ pajjiżi dwar suġġetti speċifiċi. Dan għaliex huwa tal-fehma li dawn il-mini-summits huma ferm aktar effettivi mis-Summits tal-istati membri kollha miġburin flimkien.