JAQBLU DWAR KOOPERAZZJONI FIL-MEDITERRAN ĊENTRALI

Malta, il-Ġermanja, l-Awstrija, Franza, l-Italja, Slovenja u l-Isvizzera flimkien ma’ sitt pajjiżi Afrikani – Alġerija, Libja, Mali, Niger, Chad u t-Tuniżija ffirmaw dikjarazzjoni f’Tunis fejn wiegħdu li jżidu l-kooperazzjoni ta’ bejniethom bl-għan li jikkontrollaw aħjar il-mewġa tal-immigrazzjoni fiċ-ċentru tal-Mediterran.

Il-Kummissarju tal-Immigrazzjoni Dimitris Avramopoulos qal li jeħtieġ aktar solidarjeta` u responsabbilta` kollettiva għax pajjiż inidividwali ma jistax jegħleb waħdu l-isfida tal-immigrazzjoni iżda hemm bżonn ta’ politika komuni. Id-dikjarazzjoni ta’ Tunis titratta tliet oqsma – il-kawżi tal-immigrazzjoni illegali, aktar azzjoni u kooperazzjoni biex tonqos il-mewġa ta’ immigranti, kooperazzjoni fuq ir-ritorn tal-immigranti jekk mhux eleġibbli għal protezzjoni internazzjonali.

Id-dikjarazzjoni tinkludi l-konklużjonijiet tal-Valletta Summit f’Novembru tal-2015 dwar l-iżvilupp ta’ reġjuni li għadhom lura permezz ta’ taħriġ, finanzjament ta’ intrapriżi u żieda fl-impjiegi fil-pajjiżi tal-oriġini. Twiegħed li jiżdied il-kooperazzjoni fuq l-assistenza teknika, taħriġ, skambju ta’ informazzjoni u anki tiżdied il-ġlieda kontra l-kriminalita` u t-traffikanti tal-persuni permezz ta’ taħriġ u tagħmir apposta.

Il-pajjiżi firmatarji wiegħdu kampanji ta’ tagħrif għal aktar għarfien dwar ir-riskji tal-immigrazzjoni illegali u biex ikun faċilitat ir-ritorn tal-immigranti li jridu jmorru lura f’pajjiżhom.

Fl-2017 s’issa waslu 112, 018 immigrant illegali fl-Ewropa, 85% minnhom waslu l-Italja.  2, 361 mietu waqt it-traġitt.