SITT PAJJIŻI TAL-BALKANI JAQBLU DWAR ŻONA EKONOMIKA REĠJONALI

Sitt pajjiżi tal-Punent tal-Balkani – l-Albanija, ir-Repubblika tal-Maċedonja, Bosnija-Herzegovina, Montenegro, Kosovo u s-Serbja qablu dwar pjan ta’ azzjoni biex jifformaw żona ekonomika reġjonali li ssaħħaħ il-kummerċ, l-investiment, il-mobilita` u l-ekonomija diġitali.

L-UE qed toffri sa €7 miljun ewro bħala appoġġ finanzjarju biex ikun implimentat dan il-pjan. Il-fondi se jintużaw biex fost oħrajn jitjieb l-ambjent għall-investiment u jiżdiedu l-opportunitajiet għall-kumpaniji f’din iż-żona.  Is-suq tal-Balkani għandu 20 miljun konsumatur. Iż-żona ta’ kummerċ se tkun mibnija fuq il-prinċipji tal-ftehim ta’ kummerċ ħieles tal-Ewropa Ċentrali. Il-Kummissjoni Ewropea ħabbret ukoll għajnuna ta’ €48 miljun ieħor għall-Fond tal-Iżvilupp u l-Innovazzjoni tal-Intrapriżi fil-Punent tal-Balkani.

Il-pjan mistenni jservi wkoll biex jgħin lill-ekonomiji tal-Punent tal-Balkani jlaħħqu mar-regoli ekonomiċi li jiġu bis-sħubija fl-UE. Iżda l-pajjiżi f’dan ir-reġjun jgħidu li huma mħassba li dan il-pjan qed isir flok isiru membri sħaħ tal-UE.