JEŻISTU RISKJI POLITIĊI OĦRA FIŻ‑ŻONA EWRO

 ‘Is-sitwazzjoni fil-Greċja turi li jeżistu riskji politiċi għal pajjiżi oħra fiż-żona Ewro. Jekk mhux se tingħata prijorita` massima biex jitnaqqsu u jiġu eliminati d-diverġenzi ekonomiċi fl-Ewropa, se tibqa’ problema biex ikunu implimentati r-rakkomandazzjonijiet speċifiċi għall-pajjiżi tal-UE. Hemm ħafna rakkomandazzjonijiet speċifiċi li huma riġidi u li mhumiex addattati għal ċerti reġjuni u pajjiżi tal-Unjoni Ewropea’. Dan qalu Dr. Alfred Sant, Shadow Rapporteur tal-Grupp S&D fil-Kumitat Ekonomiku u Finanzjarju tal-Parlament Ewropew fi Brussell li kien qed jiddiskuti r-rapport tad-Deputat Pollakk Dariusz Rosati dwar ir-rakkomandazzjonijiet speċifiċi li l-Unjoni Ewropea għamlet fuq it-tmexxija ekonomika tal-pajjiżi membri tal-Unjoni Ewropea.

L-Unjoni Ewropea għandha bżonn politika li tagħmel tajjeb għad-diverġenzi nazzjonali u reġjonali li qegħdin dejjem jiżdiedu fl-Ewropa u fiż-żona Ewro, ħaġa li se toħloq disgwid. Din hija l-akbar problema ekonomika fl-Ewropa. Ir-rakkomandazzjonijiet speċifiċi ekonomiċi li jsiru lill-pajjiżi membri ma jistgħux jittieħdu bħala Vanġelu. Hemm bżonn issa li l-effett tagħhom ikun evalwat u tingħata aktar importanza lill-impatt soċjali tar-rakkomandazzjonijiet li qed isiru u li ftit jistgħu jagħtu rimedju.

Ir-rapport ta’ Dariusz Rosati se jkompli jiġi diskuss fil-ġimgħat li ġejjin.

Segwi l-intervent ta’ Dr. Sant :

https://www.youtube.com/watch?v=QqNdHYFYl9o