TNAQQIS FIR‑RATA TAL‑QGĦAD F’LULJU GĦAŻ‑ŻONA EWRO

Wara xhur ta’ staġnar, ir-rata tal-qgħad niżlet b’0.2% fiż-żona ewro għax-xahar ta’ Lulju, biex b’hekk saret 10.9%. Fl-Unjoni Ewropea kollha l-qgħad naqas minn 9.6% għal 9.5%.

Kważi kull stat membru rreġistra tnaqqis fir-rata tal-qgħad għal Lulju, għalkemm f’xi pajjiżi dan it-tnaqqis kien minimu. L-ikbar tnaqqis kien reġistrat fl-Italja fejn f’xahar wieħed il-qgħad minn 12.5% naqas għal 12%. Il-Kroazja wkoll irreġistrat tnaqqis tajjeb fejn il-qgħad niżel b’0.3%, biex b’hekk ġie jlaħħaq 15.1%.

L-istati membri li qed jirreġistraw tnaqqis sostanzjali huma Malta, il-Portugall, il-Bulgarija u Spanja. 6 pajjiżi membri tal-UE rreġistraw żieda żgħira ta’ 0.1%. Dawn kienu r-Repubblika Ċeka, Franza, Ċipru, Litwanja, il-Lussemburgu u l-Finlandja.

It-tnaqqis fir-rata tal-qgħad qed jaffettwa wkoll liż-żgħażagħ taħt il-25 sena għaliex inqas minn 22% minnhom kienu bla xogħol f’Lulju, meta kkumparat ma’ 22.3% f’Ġunju. L-ikbar tnaqqis kien reġistrat l-Italja (-2.6% biex ġie 40.5%), il-Belġju (-1.3%), il-Bulgarija (-0.7%) Slovakkja (-0.7%) u l-Portugall (-0.6%). L-iktar pajjiż li kellu żieda fil-qgħad fost iż-żgħażagħ kien il-Litwanja fejn minn 18.6% tela’ għal 19.4% f’xahar wieħed.