QALB IS-SIĠAR

L-Ewropej mhux neqsin mill-ideat u l-innovazzjoni, l-aktar fil-qasam tal-arkitettura. Periti fl-Isvezja ħolqu dar speċjali fuq siġra fin-naħa ta’ fuq ta’ dan il-pajjiż, viċin il-villaġġ ċkejken ta’ Harads. Id-dar magħmula minn struttura ħafifa tal-aluminju mqiegħda fuq iz-zkuk ta’ siġra bil-qisien ta’ 4 metri kwadri. L-isbaħ ħaġa f’din l-istruttura tant sempliċi hija l-parti esterna mdawra bil-mirja. Għalhekk tirrifletti l-ambjent ħelu tal-madwar u s-sema tant ’il fuq. Permezz tal-mirja, dan ir-rifuġju jitwaħħad mal-ħolqien.

Minn ġewwa hija magħmula mill-plywood u mit-twieqi tidher ix-xena kollha tal-ambjent naturali. Fiha hemm salott għal tnejn min-nies, sodda doppja, kamra tal-banju żgħira u terrazzin fuq il-bejt. Tidħol f’din l-istruttura permezz ta’ pont magħmul bil-ħbula u mqabbad ma’ siġra fil-viċin.

Biex l-għasafar ma jaħbtux mal-mirja, dawn ingħataw saff ta’ kuluri ultravjoletti li f’għajnejn il-bniedem ma jidhirx iżda huwa viżibbli għal għasafar.

Din l-istruttura affaxxinanti turi kif il-bniedem jirrelata man-natura u kif materjali u prodotti differenti jistgħu jintużaw f’kundizzjonijiet klimatiċi ħarxa ħafna minħabba l-kesħa.