SUMMIT DWAR IL-FAQAR

Il-Parlament Ewropew stieden lil Kummissjoni Ewropea u lill-pajjiżi membri għal summit dwar il-faqar u l-esklużjoni soċjali.  Dan wara li fil-Parlament ġie approvat rapport dwar kif se jingħeleb il-faqar fid-dawl tal-ispejjeż familjari li dejjem qed jikbru.

Il-Parlament Ewropew saħaq dwar l-importanza ta’ paga diċenti biex il-bniedem jgħix ħajja dinjituża. Il-Kummissjoni qed tintalab tagħmel analiżi dwar id-dħul minimu tal-persuni biex ikun żgurat dħul minimu suffiċjenti.  Ir-rapport innota li 16.7% tal-Ewropej għadhom f’riskju ta’ faqar wara li jirċievu l-benefiċċji soċjali.

Minħabba li l-propjeta` u l-kiri tagħha qed jogħlew, id-dejn fuq il-propjeta` qed jiżdied. 11% tan-nies li jgħixu fl-Ewropa jonfqu aktar minn 40% tas-salarju tagħhom għall-akkomodazzjoni. Il-familji jridu jaraw kif se jkampaw b’dawn l-ispejjeż.

Il-kontijiet tad-dawl u l-ilma wkoll iqanqlu problemi għal min għandu dħul baxx. Fl-Ewropa 17% tal-familji b’ġenitur wieħed ma jistgħux jaffordjaw li jsaħħnu d-djar tagħhom sewwa fix-xhur tax-xitwa. Il-Parlament Ewropew ħareġ bl-idea li l-familji f’diffikulta` jingħataw self mingħajr interessi biex jinvestu f’apparat li jiggarantixxi użu tal-enerġija alternattiva bħal pannelli solari.

Il-Parlament Ewropew  saħaq dwar l-importanza ta’ aċċess għal servizzi tas-saħħa ta’ livell għoli. Saħaq ukoll dwar l-importanza li kulħadd ikollu aċċess għat-teknoloġiji ġodda.

Il-Kummissjoni Ewropea qalet li l-ugwaljanza soċjali hija parti mill-programm tagħha u konvinta li aktar koordinament fil-politika soċjali tal-UE  twassal għal riżultati tajbin.