Ma jgħaddix xahar li ma nisimgħux bi kriżi ġdida fl-Unjoni Ewropea. Il-kriżi tad-dejn fil-pajjiżi tal-UE, il-firxa tal-populiżmu, il-biża’ li r-Renju Unit joħroġ mill-UE, problemi fil-fruntieri u bini ta’ ħitan tal-‘barbed wire’ bejn pajjiż u ieħor; il-vot Olandiż kontra t-Trattat mal-Ukraina; il-biża’ għas-saħħa tal-bniedem li qed joħloq il-bexx magħruf bħala ‘glyphosate’. F’dan l-isfond ta’ kriżi wara l-oħra hemm ir-realta` ta’ estremisti tal-lemin u tax-xellug u populisti oħrajn li qegħdin isemmgħu leħinhom fil-pajjiżi tal-UE, inkluż fost il-pajjiżi fundaturi.
Dawn huma kwistjonijiet serji li qegħdin jheddu l-kredibilita` tal-Unjoni Ewropea f’għajnejn pubbliku xettiku għat-tmexxija tal-Unjoni. Dawk li jiddeċiedu fl-UE mhumiex jidhru li qegħdin jagħtu wisq każ ta’ dak li qegħdin jaħsbu n-nies. Forsi qed jagħmlu dan għax jaħsbu li l-istati nazzjonali tal-UE se jibqgħu l-qafas li jagħti l-wens, il-ħarsien u l-vuċi liċ-ċittadini taghhom.
Dan is-sentiment jinħass ukoll fil-Kunsill Ewropew għax qed tonqos il-fiduċja taċ-ċittadini fil-proġett Ewropew. Aspett wieħed mill-aspett uman hija l-kwistjoni tar-rifuġjati. Fl-aħħar xhur eluf baqgħu jilagħbu b’ħajjithom biex jaslu fix-xtut tal-pajjiżi Mediterranji tal-UE. Intqal ħafna kif l-istati membri ffaċċjaw din il-kriżi umanitarja. Dawk l-istati membri li ma qablux mal-politika tal-kwoti mhux biss għamlu għażla ħażina imma għamlu żball morali kbir. Fil-verita` llum il-politika mhix dwar moralita`, imma dwar politika effettiva li tilħaq l-iskopijiet tagħha.
L-UE qed tgħid li ma tistax titgħabba ‘bil-miżerja tad-dinja’, kif poġġiha l-Prim Ministru Franċiż Michel Rocard. Imma qed issir distinzjoni bejn immigranti u rifuġjati? Illum l-UE qed tipprova titfa’ r-responsabbilta` fuq it-Turkija. Ftit snin ilu kienet ippruvat tagħmel dan mal-Libja ta’ Gaddafi. Erdogan mhux Gaddafi. Tal-aħħar kien dittatur, Erdogan huwa President elett demokratikament. Il-President Tork sintendi qed jilgħab logħba politika mal-UE. Il-ġurnalist Tork Can Dundan qal lil Le Monde li l-Ewropa qed tagħmel żball li taħdem ma’ Erdogan. “Biex tipprova ssolvi l-kriżi tar-rifuġjati, l-Ewropa tista’ toħloq influss ġdid ta’ rifuġjati. Daqt nibdew naraw lit-Torok u lill-Kurdi jħabbtu l-bibien tal-Ewropa jitolbu għall-asil. Il-Kunsill Ewropew qed jaraha din il-possibilita`?” staqsa Dundan li jista’ jintbagħat għomru l-ħabs wara li allega li t-Turkija tat l-armi lill-Islamisti estremi.
WARA GADDAFI, ERDOGAN
Read MoreL-ISKANDLU TAL-PANAMA JŻID IL-PRESSJONI FUQ PAJJIŻI INDIVIDWALI
Read MoreIMMIGRAZZJONI: MEĦTIEĠ FTEHIM MAL-AFRIKA
Read MoreL-UE U T-TURKIJA MA JAFDAWX LIL XULXIN
Read MoreMAL-ĦAXIX ĦAŻIN TISTA’ TOQTOL LIL BNEDMIN
Read MoreL-ITALJA: PREVIŻJONIJIET REALISTIĊI U KAWTI
Read MoreVAT FUQ L-IKEL U S-SAĦĦA
Read MoreSUMMIT DWAR IL-FAQAR
Read MoreQALB IS-SIĠAR
Read MoreMalta u l-Unjoni Ewropea NL38
Read More
Post a comment