IMMIGRAZZJONI: MEĦTIEĠ FTEHIM MAL-AFRIKA

L-Italja qed timbotta għal aktar intervent Ewropew mal-Libja simili għal dak mat-Turkija fil-qasam tal-immigrazzjoni. Il-Prim Ministru Taljan Matteo Renzi qal li dan il-ftehim mat-Turkija ma għandux ikun iżolat. Meħtieġ pjan li jgħaqqad flimkien l-appoġġ finanzjarju, dak ta’ ħidma, koordinament ma’ pajjiżi terzi, kontrolli effettivi tal-fruntieri, tnaqqis fl-influssi tal-immigranti, kooperazzjoni biex isir ir-ritorn tagħhom, u ġlieda kontra t-traffikanti tan-nies.

L-Italja qed tagħfas biex ikunu identifikati pajjiżi terzi li magħhom l-UE tkun tista’ tiftiehem dwar l-immigrazzjoni. L-ebda pajjiż Afrikan ma kien imsemmi b’ismu ħlief il-Libja, pajjiż li hu transitorju u li minnu jgħaddu ħafna immigranti li jixtiequ ħajja aħjar. Bil-pjan propost, l-UE tkun kommessa ma’ għadd ta’ pajjiżi Afrikani għal aktar kooperazzjoni fil-qasam tas-sigurta`, opportunitajiet għal immigrazzjoni legali fl-UE u finanzjamenti ta’ proġetti li jkollhom impatt soċjali pożittiv. Fi ftehim bħal dan l-UE tkun tista’ titlob lill-pajjiżi Afrikani biex iwettqu kontrolli effettivi fuq il-fruntieri tagħhom bl-għan li jitnaqqsu l-influssi tal-immigranti. L-identifikazzjoni tal-immigranti eleġibbli għal protezzjoni internazzjonali u immigranti oħra ekonomiċi għandha ssir fi stadju bikri permezz ta’ aġenti Ewropej f’pajjiżi terzi.

L-għeluq tar-rotta tal-Balkani reġa’ wassal biex it-traffikanti tal-bnedmin jgħaddu l-immigranti mill-Eġittu u mil-Libja lejn l-Ewropa.