CYPRUS AIRWAYS UĠIGĦ TA’ RAS GĦALL‑KUMMISSJONI EWROPEA

L-għeluq ta’ Cyprus Airways u d-deċiżjoni tal-Kummissjoni Ewropea li l-għajnuna tal-istat li ngħatat kienet ‘illegali’ tibqa’ uġigħ ta’ ras għal Brussell, speċjalment wara li l-Membru Parlamentari Ewropew u ex Prim Ministru Malti Alfred Sant għamel sensiela ta’ mistoqsijiet parlamentari dwar l-għeluq sfurzat tal-linja nazzjonali tal-ajru Ċiprijotta. Il-mistoqsijiet kienu indirizzati lill-Kummissarju tal-Kompetizzjoni Margrethe Vestager. Dan kien żvelat mill-gazzetta Ċiprijotta The Liberal, l-iktar ġurnal influwenti ta’ kuljum bil-Grieg f’Ċipru.

Cyprus Airways waqfet topera fid-9 ta’ Jannar ta’ dis-sena wara deċiżjoni tal-Kummissjoni Ewropea li l-għajnuna li ngħatat kienet inkompatibbli mar-regoli tal-Għajnuna tal-Istat tal-UE.

Il-Ġurnal Ċiprijott irrapporta kif Dr Alfred Sant ikkritika bl-aħrax id-deċiżjoni ta’ Brussell li Cyprus Airways tagħlaq, u kkritika n-nuqqas ta’ rieda politika biex tkun sostnuta l-konnettivita`, speċjalment f’dawk ir-rotot ta’ pajjiżi gżejjer, li m’humiex daqshekk kompetittivi u li huma stati membri tal-UE.

The Liberal ikkwotat lil Dr Sant jgħid li s-soluzzjoni li qed tipproponi Brussell, dik ta’ ‘titjiriet sussidjati mill-istat’ fuq rotot li huma importanti ‘mhix realistika’ u hija soluzzjoni inkrepattiva li se tkompli tnaqqas il-flessibilita’ tal-istati gżejjer u ta’ destinazzjonijiet periferjali oħra li jeħtiġilhom isostnu u jippromwovu t-turiżmu. Għal darb’oħra, qal Dr. Sant, qed jintwera li l-politika tal-Unjoni Ewropea mhix effettiva meta jkunu implimentati r-regoli tal-għajnuna tal-istat bl-għama.’