FICO JŻOMM SOD DWAR L-IMMIGRAZZJONI

Il-Prim Ministru Slovakk Robert Fico wiegħed li jkun medjatur onest hekk kif pajjiżu se jkollu l-Presidenza għas-sitt xhur li ġejjin, qabel dik Maltija. Fl-istess nifs stqarr li pajjiżu mhux se jibdel it-twemmin tiegħu dwar il-kriżi tal-immigrazzjoni. ‘Aħna konxji tar-rwol li għandu pajjiżna matul il-presidenza imma dan ma jfissirx li lesti nibdlu l-pożizzjoni nazzjonali tagħna.’ qal Fico.

Matul il-Presidenza Slovakka mistennija jkunu diskussi suġġetti sensittivi bħall-immigrazzjoni u r-riforma tat-trattat ta’ Dublin. Fico għaraf li diffiċli jintlaħaq qbil dwar ċertu proposti tal-Kummissjoni, imma wiegħed li pajjiżu se jagħmel mill-aħjar biex jappoġġja l-aħjar soluzzjonijiet. Il-PM Slovakk wiegħed li joħroġ għad-diskussjoni suġġetti li pajjiżu ma jaqbilx magħhom bħall-programm ta’ rilokazzjoni tal-immigranti.

Il-Prim Ministru Slovakk qal li t-twaqqif tal-Aġenzija Ewropea li tħares il-fruntieri se tkun prijorita` fil-Presidenza Slovakka. Prijoritajiet oħra se jkunu l-aspetti diġitali li jaffettwaw is-suq intern u l-ekonomija Ewropea. Fico jixtieq li l-Unjoni tikkomunika b’mod aktar faċli biex iċ-ċittadini jkunu jistgħu jifhmu dak li jkun qed jiġri fuq livell Ewropew.