IL-KUMMISSJONI EWROPEA TINVESTIGA INVESTIMENTI ĠODDA BARRANIN

Fil-Kumitat Ekonomiku u Finanzjarju tal-Parlament Ewropew għaddiet proposta biex l-investimenti diretti ġodda barranin f’pajjiż membru tal-Unjoni Ewropea, jiġu eżaminati biex il-Kummissjoni tiċċertifika li ma jmorrux kontra xi programm tal-Unjoni. Dan ifisser li kull investiment ta’ fabbriki jew lukandi f’Malta jridu jkunu approvati mill-KE.

Alfred Sant kien f’minoranza li vvotaw kontra din il-proposta.

“Din il-proposta tmur kontra l-interessi tal-pajjiżi ż-żgħar u meżżani. Għalina f’Malta fejn kien dejjem diffiċli biex niġbdu lejna investiment dirett barrani, l-“iscreening” joħloq ostaklu ieħor li nistgħu ngħaddu mingħajru.” qal Sant li ma vvotax mal-linja li ħa l-grupp tas-Soċjalisti u Demokratiċi (S&D).

Dr Sant huwa l-uniku Ewroparlamentari Malti rappreżentat  fl-ECON.

“Din il-proposta se toħloq ostakli politiċi u burokratiċi ġodda għall-investiment u minħabba li hi one-size-fits-all – tlibbes żarbun l-istess lil kulħadd – l-istati membri ż-żgħar biha se jitpoġġew fi żvantaġġ,” qal Dr Sant.

B’din il-proposta l-istati membri u l-Kummissjoni Ewropea jistgħu jitolbu informazzjoni biex jiskrutinaw l-investimenti diretti fil-manifattura jew fit-turiżmu li jqajmu tħassib għas-sigurta` jew l-ordni pubblika.

Dr Sant qal li l-iskrutinju li qed jiġi previst ikun velenu għall-istati membri ż-żgħar tal-UE bħal Malta li jipprovaw jattiraw investiment barrani dirett fit-territorji tagħhom. L-ekonomiji l-kbar jistgħu jlaħħqu aħjar mal-iskrutinju u saħansitra jistgħu jibbenefikaw kompetittivament minnu. L-iskrutinju jnaffar ditti barranin milli jinvestu dirett f’postijiet bħal Malta.

Il-proposta mistennija tiġi diskussa u vvotata bħala riżoluzzjoni fil-Plenarja tal-Parlament Ewropew f’Ġunju.