MOSCOVICI FAVUR MIŻURI KOLLETTIVI FIL-QASAM TAT-TAXXA

Il-Kummissarju tat-Tassazzjoni Pierre Moscovici qal li l-UE għandha teżerċita s-sovranita` fuq it-tassazzjoni b’mod kollettiv. Moscovici qal li l-kumpaniji multinazzjonali qed jieħdu vantaġġ mill-frammentazzjoni tat-taxxa fl-UE u fuq livell Internazzjonali. Huwa ddefenda l-miżuri li tixtieq timplimenta l-Kummissjoni fis-settur diġitali. Moscovici qal li jekk ma jsirx hekk, iċ-ċittadini u l-baġits nazzjonali jmorru minn taħt waqt li r-rebbieħa jkunu l-kumpaniji multinazzjonali li jibqgħu jħallsu anqas taxxi.

Moscovici jinsab ottimist li jintlaħaq qbil unanimu fil-Kunsill dwar ċertu proposti rigward tassazzjoni għas-settur diġitali. Hu qal li l-appoġġ huwa kbir.

Numru ta’ pajjiżi Ewropej bħal Irlanda u l-Lussemburgu għandhom ħafna riżervi dwar il-proposti tal-Kummissjoni dwar it-tassazzjoni tal-kumpaniji diġitali. Dawn  jaħsbu li l-proposti huma difettużi u jimmiraw lill-kumpaniji Amerikani li żgur iqanqlu reazzjoni mill-Istati Uniti.

Pajjiżi bħall-Irlanda u l-Lussemburgu qed jisħqu fuq soluzzjonijiet fuq livell internazzjonali.

Moscovici qal li fl-UE ma hemmx ‘tax havens’ iżda l-Kummissjoni qiegħda f’kuntatt ma’ stati membri – Malta, Belġju, Ċipru, Lussemburgu, Irlanda, Olanda u Ungerija minħabba ċertu prattiċi li jintużaw fil-qasam tat-tassazzjoni. Għadu mhux magħruf il-Kummissjoni hux se tirrakkomanda uffiċċjalment lil dawn il-pajjiżi biex ibiddlu ċertu prattiċi sa Mejju li ġej.