IR-RUMANIJA  FIŻ-ŻONA EWRO FL-2022

Ir-Rumanija tista’ tkun fiż-żona ewro fl-2022 qal il-Ministru tal-Affarijiet Barranin Rumen Teodor Melescanu.

“Fil-preżent diġa` lħaqna r-rekwiżiti kollha biex nidħlu fiż-żona ewro u nistgħu nidħlu anki għada. Imma ninkwetaw li dan ikollu effett negattiv fuq id-dħul tal-iktar persuni fqar u tal-pensjonanti fir-Rumanija. Naħseb li nadottaw l-ewro fi żmien ħames snin, fl-2022.” qal Melescanu.

19-il stat membru jinsabu fiż-żona ewro, bil-Litwanja l-aħħar pajjiż li ssieħeb f’din iż-żona fl-2015. Aktar integrazzjoni bejn il-pajjiżi fiż-żona ewro tista’ tfisser aktar obbligi għal dawk li huma ġewwa u riskju li jitħallew fl-għama f’ċerti deċiżjonijiet dawk il-pajjiżi li huma barra.

Ir-Rumanija għandha popolazzjoni ta’ 21.4 miljun ruħ u bħalissa għandha ekonomija li qed tikber. Xorta tibqa’ waħda mill-iktar pajjiżi fqar tal-Unjoni Ewropea.