TAL-PN MUTI DWAR IL-KUMMISSARJU ĠDID EWROPEW NOMINAT MINN MALTA

Diġa` għaddew ħmistax-il ġurnata u l-Partit Nazzjonalista għadu ma weġibx għall-mistoqsija ta’ Alfred Sant jekk hux se jappoġġja n-nomina tal-Kummissarju Malti ġdid wara l-elezzjonijiet Ewropej. Il-poplu Malti u Għawdxi għandu dritt ikun jaf x’se tkun il-pożizzjoni tal-PN f’din l-eventwalita`. Tal-PN diġa` ħadmu kontra l-kandidatura ta’ Leo Brincat fil-Qorti tal-Awdituri. Did-darba jridu jgħidu minn issa x’se tkun il-pożizzjoni tagħhom.

Alfred Sant qal li l-ħsara li għamlu r-rappreżentanti tal-PN fil-Parlament Ewropew hija waħda kbira. Weġġgħu r-reputazzjoni ta’ Malta biex mingħalihom jirbħu punti politiċi. Did-darba tal-PN aċċelleraw il-ħsara lil Malta, ferm aktar milli kienu jagħmlu fis-snin tmenin tas-seklu l-ieħor meta kienu ippruvaw igerrxu l-investiment Ġermaniż minn Malta.

“Dawn għadhom l-istess nies.  Tletin sena ilu kienu jmorru fl-Ewropa biex ma jiftħux fabbriki f’Malta. Illum l-istess nies iħeġġu lill-partitarji Nazzjonalisti biex jivvotaw lil dawk li fl-aħħar ħames snin għamlu ħsara kemm felħu lil Malta. Tal-PN biss jikkalpestaw lil pajjiżhom! Imkien ma jiġru dawn l-affarijiet.”

Ħadd fil-Parlament Ewropew ma jaħdem kontra pajjiżu. Rajna delegazzjonijiet minn pajjiżi differenti tal-Ewropa jiddefendu lil pajjiżhom meta pajjiżhom kien ikkritikat.

Id-delegazzjonijiet tal-Partiti differenti ta’ Ċipru u tal-Irlanda kienu magħqudin jiddefendu lil pajjiżhom meta ġew ikkritikati fuq kwistjonijiet li jolqtu lill-popli tagħhom.

L-aktar ħaġa prezzjuża għalija hija l-isem ta’ Malta,  fil-Parlament Ewropew u kullimkien, qal Alfred Sant.