FONDI GĦALL-VITTMI TAL-KRIŻI FINANZJARJA

Għexieren ta’ biljuni tal-ewro fil-baġit il-ġdid jistgħu jintużaw biex jassistu pajjiżi li kienu vittmi tal-kriżi finanzjarja, bħal Spanja u l-Greċja, u mhux jingħataw lil pajjiżi tal-Ewropa ċentrali bħal Polonja, Ungerija u Repubblika Ċeka, irrapportat il-Financial Times.

Il-ġurnal qal li l-idea hija li jitwaqqfu l-finanzjamenti bbażati biss fuq il-PGD ras għal ras tal-popolazzjoni tal-istati membri, u magħhom jiżdiedu fatturi oħra bħal qgħad fost iż-żgħażagħ, politika ambjentali, innovazzjoni u politika tal-immigrazzjoni.

Jekk jidħlu dawn il-kriterji ġodda għal finanzjamenti, jmorru l-agħar l-aktar l-Ungerija u l-Polonja. Ir-Repubblika Ċeka u l-Istati Baltiċi wkoll jitilfu l-fondi. L-aħjar li jmorru f’xenarju bħal dan ikunu l-pajjiżi tas-Sud tal-Ewropa li l-aktar li ntlaqtu mill-kriżi finanzjarja u l-miżuri ta’ awsterita` bħall-Italja, Spanja u l-Greċja. Il-Financial Times irrapportat li l-Kanċilliera Ġermaniża Angela Merkel u l-President Franċiż Emmanuel Macron jaqblu li tiddaħħal kriterja li tiffavorixxi l-pajjiżi bl-akbar numru ta’ immigranti.