ĠUDIZZJU DWAR IŻ-ŻONA EWRO  

Il-Kummissjoni Ewropea esprimiet l-opinjoni tagħha dwar il-baġits tat-tmintax-il pajjiż taż-żona ewro, bl-eċċezzjoni tal-Greċja.

Il-Kummissjoni hija mħassba dwar il-baġit ta’ Franza li ilha mill-2009 bi proċeduri minħabba defiċit eċċessiv u li kellu jkun taħt kontroll sal-2018.

Rigward Spanja, minkejja l-kriżi Katalana, Spanja tidher li miexja tajjeb u qed iżżomm mal-obbligi tagħha. Bħal Franza, Spanja mistennija toħroġ mill-proċeduri ta’ defiċit eċċessiv fl-2018.

Skont il-Kummissjoni, sitt stati membri – Ġermanja, Litwanja, Latvja, Lussemburgu, Finlandja u Olanda – ippreżentaw baġit konformi mar-regoli baġitarji Ewropej. Ħames pajjiżi oħra – Malta, Estonja, Irlanda, Ċipru, Slovakkja – issottomettew baġits li jikkonformaw ħafna mar-regoli Ewropej.

Il-Kummissjoni qalet li l-baġits ta’ ħames pajjiżi oħra – Belġju, Italja, Awstrija, Portugall u Slovenja jippreżentaw ir-riskju li ma jikkonformawx mar-regoli Ewropej. Il-Belġju u l-Italja x’aktarx mhux se jirnexxielhom inaqqsu d-dejn tal-Gvern. B’mod partikolari d-dejn tal-Gvern Taljan qed iħasseb ħafna lill-Kummissjoni għax jippreżenta ħafna riskji bħal – nuqqas ta’ tkabbir ekonomiku, nuqqas ta’ privatizzazzjoni u ħlasijiet arretrati tal-amministrazzjoni pubblika. Minħabba d-daqs tal-ekonomija Taljana, is-sitwazzjoni tħasseb liż-żona ewro kollha, qalet il-Kummissjoni li mistennija terġa’ tagħti ħarsa lejn il-baġit Taljan fir-Rebbiegħa tal-2018.