JARA LIL MOSKA FIL-POLONJA

Il-President tal-Kunsill tal-Unjoni Ewropea Donald Tusk akkuża lil Gvern Pollakk li qed imexxi bi stil politiku li jfakkru fil-Kremlin.

Tusk esprima t-tħassib tiegħu għat-tixbiħ bejn il-politika tal-lemin estrem tal-gvern Pollakk u l-politika Russa. Fost oħrajn semma l-iżolament tal-Polonja fi ħdan l-UE, in-nuqqas ta’ indipendenza fil-ġudikatura, l-għibien tal-liġi tad-dritt u l-attakki kontra l-għaqdiet mhux governattivi u l-midja ħielsa. Dan kollu huwa “wisq simili” ta’ dak li jsir fir-Russja “biex norqdu komdi” qal Tusk.

Il-Prim Ministru Pollakka Beata Szydlo irribattiet li Tusk “ma għamel xejn għal Polonja” fir-rwol tiegħu ta’ President tal-Kunsill tal-Unjoni Ewropea. Szydlo akkużat lil Tusk li qed juża l-pożizzjoni tiegħu biex jattakka l-Gvern Pollakk. “Qed jattakka lil Polonja” qalet Szydlo.

Tusk huwa ex-Prim Ministru liberali Pollakk u tlaqqam bħala ‘għadu’ mill-Gvern Konservattiv attwali Pollakk. Din is-sena l-Polonja vvotat kontra t-tiġdid tal-mandat tiegħu bħala President tal-Kunsill tal-Unjoni Ewropea.