IL-GREĊJA SSAĦĦAĦ IL-FINANZI PUBBLIĊI

Il-Kummissjoni Ewropea rrakkomandat lil Kunsill biex tagħlaq il-Proċeduri ta’ Defiċit Eċċessiv għal Greċja. Dan wara l-isforzi tal-aħħar snin biex il-Greċja ssaħħaħ il-finanzi pubbliċi tagħha u timplimenta il-Mekkaniżmu Ewropew ta’ Stabilita`. Dawn l-isforzi fissru dħul ta’ aktar miżuri ta’ awsterita`. Jekk il-Kunsill jimxi fuq ir-rakkomandazzjoni tal-Kummissjoni, tliet membri biss jibqgħu taħt il-Proċeduri ta’ Defiċit Eċċessiv – Franza, Spanja u r-Renju Unit.

Il-Viċi-President Valdis Dombrovskis, responsabbli għall-Ewro u d-Djalogu Soċjali qal, “Ir-rakkomandazzjonijiet tagħna huma sinjal ta’ stabilita` u rkupru ekonomiku. Nistieden lil Greċja tibni fuq dak li kisbet u ssaħħaħ il-kunfidenza fl-ekonomija tagħha.”

Il-Kummissarju tal-Ekonomija u l-Affarijiet Finanzjarji Pierre Moscovici qal li dan huwa mument simboliku għall-Greċja. “Wara tant sagrifiċċji, il-pajjiż qed jaħsad dak li żera’”, qal Moscovici.

Ir-riżultati pożittivi mistennija jibqgħu lil hinn mill-2018 u d-defiċit mistenni jibqa’ ħafna inqas mil-limitu ta’ 3% li jistipulaw ir-regoli tal-UE.

Minkejja li d-defiċit qiegħed taħt kontroll, il-Greċja ngħatat ħlas ta’ 7.7 biljun Ewro dan ix-xahar bħala assistenza finanzjarja biex tħallas djun li kienu se jagħlqu.