JUNCKER  SKREDITAT FL-UNGERIJA

L-Ungerija ħabbret li fil-15 ta’ Marzu se twaqqaf kampanja pubbliċitarja kontra Jean-Claude Juncker u l-filantropu Amerikan George Soros li matulha ġew akkużati li jappoġġjaw l-immigrazzjoni illegali.

Il-Kummissjoni Ewropea irribattiet punt punt l-akkużi tal-Gvern Ungeriż u iddeskriviet il-kampanja bħala “inkorretta u qarrieqa”.

Dil-kampanja irrabjat partiti membri tal-Partit Popalari Ewropew (PPE), il-partit politiku ta’ Juncker.

Manfred Weber, il-Kap tal-PPE, qal li l-kampanja għamlet ħsara tremenda lil PPE. Fidesz, il-Partit tal-Prim Ministru Ungeriż Victor Orban, huwa membru tal-PPE.

“Orban għandu jagħmel apoloġija għall-attakki kontra Juncker,” qal Weber.

Partiti politiċi oħra fi ħdan l-PPE qalu li lesti jappoġġjaw t-tkeċċija tal-Fidesz mill-PPE.

Il-gvern Ungeriż qal li lest joqgħod għall-kritika iżda d-deċiżjoni tal-poplu Ungeriż hija importanti ħafna aktar mid-dixxiplina tal-PPE.