TARIFFI ĠODDA FUQ PRODOTTI AMERIKANI

L-UE qed tikkonsidra tagħmel tariffi ġodda fuq prodotti Amerikani biex tpatti għas-sussidji li qed tirċievi l-kumpanija tal-ajruplani Amerikana Boeing mill-Istati Uniti. Il-Kummissjoni  Ewropea mistennija tibgħat lista ta’ prodotti li jistgħu jkunu affettwati b’dawn it-tariffi l-ġodda.

Kmieni din il-ġimgħa l-President Amerikan Donald Trump qal li tariffi ġodda se jidħlu fuq prodotti Ewropej. Dan bħala reazzjoni għas-sussidji li qed jingħataw lil Airbus, kumpanija Ewropea produttiċi tal-ajruplani. Dawn it-tariffi kapaċi jolqtu prodotti agrarji, prodotti industrijali u parts tal-ajruplani li jlaħħqu total ta’ $19-il biljun dollaru Amerikan.

In-nuqqas ta’ qbil bejn l-UE u l-Istati Uniti dwar il-kummerċ u s-sussidji ilu għaddej mindu Trump sar President tal-Istati Uniti.

Id-deċiżjoni finali dwar is-sanzjonijiet Amerikani u dwar is-sussidji lil Boeing u anki lil Airbus se jkun deċiż minn arbitru tal-Organizzazzjoni Dinjija tal-Kummerċ.