ŻWIĠIJIET FOLOZ BIEX JGĦIXU FL-UE

Grupp ta’ kriminali li joperaw fil-Ġermanja se jkunu akkużati li ġabu illegalment numru ta’ nisa u rġiel mill-Indja u n-Nepal fl-UE biex permezz ta’ kuntratt jiftiehmu magħhom dwar żwiġijiet foloz għal permess ta’ residenza fl-UE.

L-aġenziji tal-pulizija Ewropej Eurojust u Europol ħabbru l-iżmantellar ta’ din il-klikka ta’ kriminali li kienet qed tagħmel eluf ta’ ewro minn fuq din is-sistema. L-investigazzjoni, li għadha għaddejja, żvelat li kull immigrant ħallas lit-traffikanti madwar €12,000 għal pakkett ta’ servizzi, li jinkludi l-vjaġġ lejn l-Ewropa, id-dħul fil-Ġermanja, l-applikazzjoni għal permess ta’ residenza u l-organizzazzjoni ta’ ċerimonja ta’ żwieġ. Saru 17-il tfittxija f’residenzi differenti u nħarġu ħames mandati ta’ arrest mill-pulizija muniċipali ta’ Munich.

Il-pulizija ta’ Munich qed jikkooperaw ukoll mal-awtoritajiet Rumeni u Pollakki.