140 SENA BIEX JIPPROĊESSAW L-IMMIGRANTI

Ir-reġistrazzjoni ta’ aktar minn 3 miljun immigrant Ewropew li diġa` qed jgħixu fir-Renju Unit se tkun biċċa xogħol amministrattiva kbira għall-gvern Ingliż. L-esperti flew is-sistema attwali li tintuża biex persuni japplikaw għal residenza permanenti f’dan il-pajjiż biex jeżaminaw x’diffikultajiet jinħolqu jekk minħabba l-Brexit tinbidel is-sistema.

L-analiżi turi li jekk iċ-ċittadini kollha li ġejjin mill-pajjiżi membri tas-suq intern u li qed jgħixu fir-Renju Unit fl-2016 japplikaw għal residenza permanenti fl-istess sena, bir-rata tal-iproċessar kif inhi llum, ix-xogħol amministrattiv idum għaddej 140 sena biex jitlesta.

Wara r-referendum, ir-Renju Unit se jibdel ir-regoli tal-moviment ħieles tal-persuni. Iżda għad ma tħabbrux ir-regoli l-ġodda tal-proċess.

Madeleine Sumption, id-direttriċi tal-‘Migration Observatory’ fl-Universita` ta’ Oxford qalet, “Jiddependi fuq kemm se jdumu n-negozjati tal-Brexit, il-gvern jaf ikollu l-ħtieġa li jirreġistra liċ-ċittadini Ewropej li diġa` qed jgħixu hawnhekk.’

Bir-regoli attwali, l-Ewropej li ma ċċaqilqux mir-Renju Unit għal dawn l-aħħar ħames snin, awtomatikament għandhom id-dritt għal residenza permanenti.

L-istudju li sar jagħti ħjiel tal-problemi li jistgħu jinqalgħu ġaladarba s-sistema tar-reġistrazzjoni tinbidel. Pereżempju, jekk il-moviment ħieles tal-ħaddiema jispiċċa wara n-negozjati mal-UE, iċ-ċittadini Ewropej fi żmien qasir ikollhom bżonn juru dokumenti tad-dritt tar-residenza. Dan biex jiddistingwu ruħhom miċ-ċittadini Ewropej il-ġodda li jkunu waslu fir-Renju Unit mingħajr id-dritt tal-moviment ħieles tal-ħaddiema.