IS-SUD JIPPROVA JINGĦAQAD

Il-Prim Ministru Griek Alexis Tsipras stieden lil mexxejja ta’ Franza, Italja, Spanja, Portugall, Ċipru u Malta għal konferenza bl-għan li tissaħħaħ l-alleanza bejn dawn il-pajjiżi tas-Sud tal-Unjoni Ewropea. L-alleanza fost dawn il-pajjiżi għandha l-għan li tmur kontra l-programm ta’ awsterita` li qed jimponu l-pajjiżi Nordiċi fl-UE.

Il-Prim Ministru Taljan Matteo Renzi jaqbel mal-idea ta’ Tsipras li l-pajjiżi tas-Sud tal-Ewropa għandhom joħolqu l-programm tagħhom ta’ tkabbir ekonomiku li jikkuntrasta mal-politika ta’ awsterita`.

Tsipras ilu jisħaq fuq alleanza tal-pajjiżi tas-Sud  tal-Ewropa minn qabel l-elezzjonijiet tal-2015. Huwa minnu li fl-Unjoni Ewropea d-diverġenzi bejn il-pajjiżi ċentrali tal-Ewropa u dawk li qegħdin fil-periferija tal-Ewropa, qegħdin dejjem jikbru. L-għan tal-Unjoni, li ġġib lil pajjiżi l-istess ekonomikament, mhux qed jirnexxi. Agħar minn hekk, fl-aħħar snin il-politika Ewropea kompliet żiedet id-diverġenzi bejn il-pajjiżi hekk kif aktar riżorsi qed jimxu lejn l-Ewropa ċentrali filwaqt li l-ekonomiji tal-pajjiżi fil-periferija qed jistaġnaw.

Malta s’issa skansat dan il-mewġ u baqgħet miexja b’vapur sod f’baħar imqalleb. Kemm se jirnexxielha tibqa’ sejra hekk fil-futur? Ilha snin tiġi affettwata ħażin bil-politika ta’ ‘one-size-fits-all’ tal-Unjoni Ewropa, politika li taġevola lil pajjiżi ċentrali tal-Ewropa li huma mogħnija b’ħafna riżorsi. Politika li ċekknet ħafna setturi ekonomiċi Maltin fosthom is-settur agrikolu u dak industrijali. Malta rnexxielha ssaħħaħ settur wieħed, li permezz tiegħu l-ekonomija tikber, dak tas-servizzi finanzjarji u l-igaming.

Iżda fix-xefaq qed iberraq minħabba l-armonizzazzjoni tat-taxxa. It-tbassir hu li regola bħal din toħloq il-maltemp fis-settur tas-servizzi finanzjarji f’pajjiżna. Fl-interess ta’ Malta  li tagħmel alleanzi ma’ pajjiżi oħra fil-periferija tal-Ewropa. L-isfortuna hi li l-pajjiżi fil-viċin maħkuma mill-maltemp. Terġa’ l-interessi tagħhom huma xorta differenti minn tagħna. Fil-mument tal-verita` kulħadd jiġbed lejn xawwatu. Allura b’alleanza fil-verita` x’se jinkiseb?